داعش ءَ ھوار بیتگیں زالبول ءَ دزبندی کتگ واتر امریکہ ءَ روگ لوٹ آں

امریکہ ءِ ریاست الاباما ءَ وتی لوگ ءَ چہ تتکگ ءُ شام ءَ داعش ءَ ھوار بیوکیں جنک ءَ واتر امریکہ ءَ آیگ ءِ دزبندی کتگ-

ھال سر کنوکیں ادارہ ایسوسی ایٹڈ پریس ءِ رد ءَ یک گلگدارے ءِ توک ءَ الاباما ءِ جھمنند ھدیٰ مثنیٰ ءَ گوشتگ کہ سال دو ھزار ءُ چاردہ ءَ انٹرنیٹ ءَ جاڑیگیں ٹریفکنگ ٹولی ءَ داعش ءَ بھر زورگ ءَ ساجو کتگ ءُ آئی ءَ وتی کتگینانی سر ءَ پدردی اِنت-

بیست ءُ ھشت سالی ئیں ھدیٰ مثنیٰ ءَ شام ءَ روج بنجل ءَ امریکہ ءِ ھمسنتیں کرد ءِ لشکر ءِ دستیگی ءَ اِنت-

ھدیٰ مثنیٰ ءَ گوشتگ کہ آ باز کسان ءُ نادان بیتگ کہ آئی ءَ داعش ءَ بھر زرتگ ءُ گمان اِنت امریکہ ءِ سرکار آئی ءِ رد ءَ ھمے رنگ ءَ چار ایت-

اگاں من ءَ جیل ءَ وھد گوازینگ کپت من آئی ءِ ھلاپ ءَ گھگیری نہ کن آں-

آئی ءَ گوشتگ کہ من امریکہ ءِ روگ ءَ پد داعش ءِ ھلاپ ءَ ترندیں توار چست کن آں-

ھدیٰ مثنیٰ ءِ امر آ وھد ءَ بیست سال بیتگ کہ آئی ءَ وتی لوگ یل کتگ ءُ داعش ءِ بھر جوڑ بیتگ-

ھمے وھد ءَ آئی ءَ داعش ءِ یک جنگولے ءِ گون ءَ آروس ھم کتگ ءُ آئی ءَ زھگ ھم ھست کہ نی اسکول ءِ روگ ءِ بود ءَ اَنت-

ھدیٰ مثنیٰ ءَ بازیں رنداں اے گپ پدر کرتگ کہ آ نادانی ءَ چہ داعش ءِ بھر جوڑ بیتگ بلے چار سال ءَ پیش چاگردی ترامجاھاں آ ناشریں ٹولی ءِ پلامرزی ءَ یکشل ءَ بیتگ کہ اے ھما وھد بیتگ داعش گل وتی پرکاری ءِ توک ءَ بیتگ ءُ آئی ءَ اسلامی ھلافت ءِ جار جتگ ءُ شام ءُ عراق ءِ یک نیم بھرے وتی دستیگی ءَ کتگ-

سال دوھزار ءُ پانزدہ ءَ ھدیٰ مثنیٰ ءِ ٹوئٹر سائیٹ بیوکیں یک پوسٹے ءَ آئی ءَ امریکہ ءِ جھمنندیں مردماں داعش ءَ ھوار بوگ ءِ داوت داتگ ءُ امریکہ ءِ سر ءَ اُرش کنگ ءِ سکین داتگ اَنت-

بلے آئی ءَ وتی گلگدار ءَ گشتگ آئی ءِ پون برگ بیتگ ءُ داعش ءِ کارندھاں آئی ءِ ٹوئٹر ءَ پوسٹ کتگ –

ھدیٰ مثنیٰ ءِ پت ءُ مات چہ یمن ءَ اتکگ ءُ امریکہ ءَ جھمنندی بیتگ اَنت – ھدی ءِ ودی بوگ ءِ جاہ امریکہ ءِ ریاست نیو جرسی ءَ بیتگ-

سال دوھزار ءُ چاردہ ءَ ھدیٰ مثنیٰ ءَ وتی پت ءُ ماتاں گشتگ کہ آ اسکول ءِ ھمراھانی ھمراھی ءَ سیل ءُ سواد ءَ روگ ءَ اِنت بلے آئی ءَ فلائٹ بک کتگ ءُ ترکیہ ءُ شتگ ءُ چمود ءَ چہ شام ءَ شتگ-

امریکہ ءِ گوستگیں سروک باراک اوباما ءِ وھد ءَ ھدیٰ مثنیٰ ءِ امریکہ ءِ شھریت ھلاس کنگ بیتگ ءُ ھمے وھد ءَ آئی ءِ ودی ءِ بوگ ءِ وھد ءَ آئی ءِ پت یمنی سپارتکار بیتگ-

ھدیٰ مثنیٰ ءِ وکیلاں اے گپ ءِ سر ءَ گامگیج زوران ءَ گشتگ کہ ھدیٰ مثنیٰ ءِ ودی بوگ ءِ وھد ءَ پت سپارت ءِ اگدو ءَ ھلاس بیتگ-

میان اُستمانی گل ھیومن رائٹس واچ ءِ گوستگیں رپورٹ ءِ رد ءَ شست ءُ پنچ ھزار ءِ کچ ءَ داعش ءِ نام گپتیں باسک ءُ آیانی کھول شام ءَ امریکہ ءِ ھمسنتیں ٹولی کرد ءِ بنجلاں بندیگ اَنت-

ایشانی توک ءَ شامی شھری ءُ درملکی ھوار اَنت ءُ ایشانی توک ءَ سی ءُ نُھ کس امریکہ ءِ جھمنند واتر شتگ اَنت-