پشتونخوا ءُ گلگت بلتستان ءَ بؤکیں ریاستی زلم ءُ زوراکیاں ایرجن ایں – بی این ایم

بلوچ نیشنل موومنٹ ءِ جارکش ءَ رسانکدراں وتی شنگ کرتگیں درشان ءِ تہ ءَ گْوشتگ کہ درستیں ایردستیں راجانی تورشت یک وڑ ءَ اَنت – ما پشتونخوا ءَ استانی زوراکی ءُ گلگت بلتستان ءَ دمگی مردمانی زمیناں گوں زور ءُ زوراکی دستیگ کنگ ءَ ایر جن ایں –

جارکش ءَ گوشتگ کہ گلگت بلتستان ءُ پشتونخوا ءِ مردمانی گھگیریاں اے گپ تچک کرتگ کہ پاکستان ءَ ھچ راج پنجاپ ءِ بالادستی ءِ منگ ءُ چہ وتی راجی پجار ءَ دستبردار بیگ ءَ ساڑی نہ اِنت – ایردستیں راجانی زمین ءُ مڈیانی سر ءَ کبزہ کنگ ءَ ابید پاکستان ءَ یک روچے ھم وتی واکداری ءَ برجاہ داشت نہ کنت-

آئی ءَ گوشتگ کہ مروچی بلوچ، پشتون ، سندی ، کشمیری، گلگت بلتستان ءُ سرائیکی وسیب ءِ کروڈانی کچ ءَ مردم چہ پنجاپ ءِ واکداری ءَ شیزار اَنت – چریشی ءَ پاکستان ءِ برجاہ بیگ ءِ نیمون آسر بیتگ – ھرچ راج ءَ وتی زمین ءِ سر ءَ ابید ڈک ءُ بند ءَ سرجمیں واک ءُ آجوئی بیگ لوٹ ایت- چہ زیردستیں زند ءَ دمگ ءِ تہ ءَ نندوکیں راجانی راجی مانشت ھترہ تہ ءَ انت – گلگت بلتستان ءِ راج ءُ پشتون راج ءَ ماں ھر سنگر ءَ وتی گھگیری بنا کنگ لوٹ ایت-

بی ان ایم ءِ جارکش ءَ گْوشتگ زیردستیں راجاں پہ وتی کسان کسانیں آسراتی، چاگرد ءَ بے سیتیں جھد کنگ ءِ جاہ ءَ پہ وتی آجوئی ءَ زورگیریں پاکستان ءِ بگیری ءَ گوں ھم سنتی ءَ جھد کنگ لوٹ ایت-

آئی ءَ گْوشتگ پاکستانی پوج گلگت بلتستان ءَ دمگی مردمانی زمیناں دستیگ کنگ ءُ آیانی راجی پجار ءَ ببا دیگ لوٹ ایت ءُ ایشی ءِ بگیری ءَ گھگیری کنوکیں مردمانی توار گوں زوراکی ءَ ایرموش کنگ بیگ ءَ اِنت – پاکستان ءَ بلوچانی ھم ماں وتی جند ءِ زمین ءَ کچ ءُ سرانی کم کنگ ءَ گوں انچیں پندلاں بنا کرتگ اَت – گوادر ءِ پجیگ ءَ بازیں دمگاں مردمانی زمین دستیگ کنگ ءُ دری مردمانی آباد کنگ ءِ شوندات جوڑ کنگ بیتگ –

جارکش ءَ گْوشتگ زمینانی دستیگ کنگ ءِ بگیری ءَ گلگت بلتستان ءِ مردماں باز روچ اِنت کہ زھرشانی کنگ ءَ اَنت بلے گوشداروک نیست۔پاکستانی استان ایوک ءَ پنجاپ ءَ مزدانک آسراتی دئے اَنت ءُ دگہ راج گوں چیردستی چماں چارگ بہ اَنت چریشی ءَ ھمے راجاں وتی چیردستی ءِ سما بیتگ ءُ آ ایشی ءِ بگیری ءَ جھد کنگ ءَ اَنت –

آئی ءَ گْوشتگ پشتونخوا ءَ پاکستانی استان یک رندے پد ءَ لشکرکشی ءَ سر گیپتگ -گْوست ءَ ھم سلاھبندیں گلانی بگیری ءَ آپریشن ءِ نام ءَ مردمانی مڈی تاوان دیگ بیتگ اَنت- ھزاراں بے میار کشگ بیتگ ءُ لکا مردمانی لوگ ءُ کار تباہ کنگ ءُ آ پہ لڈ ءُ بار کنگ ءَ لاچار کنگ بیتگ اَنت- نی یک رندے پد ءَ چہ امریکا ءُ دگہ ڈیھاں ڈالر گرگ ءَ پشتون راج ءِ سر ءَ نوکیں جنگے ءِ چن ءُ لانچ بیگ ءَ اِنت-

جارکش ءَ وتی درشان ءِ تہ ءَ گْوشتگ پشتون ءُ بلوچ دوئیں ابرمی ھم سنت راج اَنت دوئیں راجانی سیت گوں یک دومی ءَ بندوک اَنت۔ چہ نام ءِ ناشرکاری ءِ بگیری ءِ جنگ ءِ ساناں بلوچستان ھم سانمند بیتگ – اے جنگ ءِ نیمون ءَ پاکستانی استان راجی جست ءَ چیرترینگ لوٹ ایت کہ چہ ایشی ءِ گیشینگ ءَ ابید دمگ ءَ ایمنی برجاہ بیت نہ کنت-