بلوچستان ءِ سُتکگیں وانگجاہ (اسکول) — زارین بلوچ

الم بوانیت

آھوگ تو اے وڑ مہ کُتیں۔۔۔ – بالاچ قادر

آھوگ تو اے وڑ مہ کُتیں۔۔۔ بالاچ قادر دی بلوچستان پوسٹ گُل ترا یات بیت ھما وھدی کہ توءُ دگہ سنگتے مئے...

کمےّ وھد کشّ – منھاج مختار

کمےّ وھد کشّ منھاج مختار دی بلوچستان پوسٹ تو ھم زانئے کہ من ترا گشگایاں بلے اگاں ترا موھ رست منی اے...

بلوچستان ءِ آجوئی ءِ ترس ءُ پاکستانءِ نوکیں پالیسی: نبشتہ حکیم واڈیلہ

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ...

بلوچستان ءِ سُتکگیں وانگجاہ (اسکول)

دی بلوچستان پوسٹ گچینی

زارین بلوچ

بلوچستان ءِ وانگی بودیشت بے کساس جیڑھانی آماچ اَنت۔ لائکیں استادانی کمی، آسراتیاں چہ زبھریں سرکاری وانگجاہ، وتگڑیں نساب، ریارو ءُ پلہ داری ءِ دیمروی کنوکیں دود، ءُ بورڈ ءِ سالگشتیں چکاسانی تہ ءَ سرزائری ءَ مَکر کنگ چہ اشاں لھتے اَنت۔ بلے گوستگیں لھتیں ماھانی تہ ءَ، دگہ یک مزنیں جیڑھے اے لڑ ءَ ھوار بیتگ، کہ آ وانگجاھانی مان دارگ اِنت۔

گوستگیں لھتے ماھانی نیام ءَ کیچ، وندر، پسنی، پنجگور ءَ بلوچستان ءِ جتاجتائیں دمگانی تہ ءَ سرکاری ءُ زاتی وانگجاہ مان دارگ بیتگ اَنت۔ ھندی مردمانی گُشگ اِنت کہ جرمکاراں شپ ءِ نیام ءَ وانگجاھانی تہ ءَ پُرشت ءُ پروش کُتگ ءُ تتکگ اَنت۔ اے وانگجاھانی تہ ءَ ھست بیتگیں فرنیچر، وانگی، لیب ءِ ازباب ءُ کمپیوٹر سُتکگ ءُ پُر بیتگ اَنت، کہ اِشانی سوب ءَ گیشتریں وانگجاہ بند کنگ کپتگ اَنت۔

اھوالانی رد ءَ تھنا کیچ ءِ دمگ ءِ تہ ءَ سئے وانگجاہ (اسکول) مان دارگ بیتگ اَنت، چریشی ءَ آگیر کارامد بیتگ اَنت۔ بلوچستان ءِ دگہ دمگانی تہ ءَ ھم وانگجاھانی مان دارگ ءِ اھوال دیم ءَ اتکگ اَنت، البت کیچ ءِ تہ ءَ اے دروشم ءِ اولی وئیل اِنت۔ جرمکاراں وانگجاھاں پنتاک دور داتگ اَنت ،کہ اِشانی تہ ءَ روکپتی وانگی بودیشت ءِ بگیر ءَ جھاد ءِ تہ ءَ مان دارگ ءَ آیانی بُنکی مکسد گُشگ بیتگ۔ الفرقان اسلامی نامی یک بے پدریں ٹولے ءَ وانگجاھانی مان دارگ ءِ زمہ واری من اِتگ۔

بے پدریں ٹولی ءَ ٹاہ داتگ کہ وانگجاہ روکپت ءِ وانگی بود ءَ بلوچستان ءَ آرگ ءَ اَنت، چریشی ءَ اد ءِ مھلوک سنچ داری مُل ءُ مڑاہ ءَ چہ زبھر کنگ بیت ءُ چاگرد ءِ جٗوڑِشت ءَ ھلاس کنت۔ جرمکاراں وتی چکاں اے وانگجاھانی روان دیگ ءِ جاہ ءَ چہ مات ءُ پتاں لوٹ کُتگ کہ آ وتی چکاں نیکراھی مکتباں دیم بہ دے اَنت کہ آ اود ءَ نیکراھی وانگ ءِ دربرگ ءَ گوں دنیا ءُ پرداہ ءِ تہ ءَ سوبمند بیت بہ کن اَنت۔

اے ٹولی ءَ پنجگور ءَ ھم پنتاک دور داتگ کہ اِشی تہ ءَ مات ءُ پِت بیھار دیگ بیتگ اَنت کہ آ وتی چکاں زاتی وانگجاھان روان مہ دے اَنت۔ ٹولی ءَ گُشتگ کہ مات ءُ پِت وتی چکاں سرکاری وانگجاھاں دیم بہ دے اَنت۔ اے ٹولی ءَ زاتی وانگی ءِ سر ءَ لس وانگی ءِ ارزشت دیگ ءِ منانک دات نہ کُت۔ بیت کنت راستی ایش اِنت ک گیشتریں زاتی وانگجاھانی تہ ءَ ھواریں وانگی ربیدگ اِنت، کہ اود ءَ بچک ءُ جِنِک یکیں تبک ءَ ھوار نند اَنت، بیت کنت گوں ھمے راستی ءَ جیڑھے بہ بیت۔ پنجگور ءَ ڈھجاریں پنتاک ءُ لھتے ارشاں پد پھازگی سوبانی پد ءَ سئے ماھانی وانگجاہ بند کنگ بیتگ اِت اَنت۔ آ ھمے سال ءَ اگست ءَ تُرس ءُ لرز ءَ گوں پد ءَ پچ کنگ بیتگ اَت اَنت۔

اے ٹولیانی لیکہ ءُ سوبانی کِشک بے سر ءُ وتگڑین اَنت۔ اولی وَ ایش کہ کجام نیکراھی وانگی وتی رندگیراں چہ نیکراھی وانگ ءِ تالان کنگ ءِ ھاتر ءَ وانگجاھانی مان دارگ ءِ لوٹ کنت؟ ءُ سِتکانی اے وساچیں پھازوکاں نیکراھی ءِ نام ءَ اکلاکی پرمان شنگ کنگ ءَ زمہ واری ءَ کئے دَنت؟ دومی گپ ایش کہ بلوچستان ءِ وانگجاھانی چُشیں جاور پرچہ کنگ بیتگ؟ چُشیں وئیل پاکستان ءَ دگہ جاھاں پرچہ نہ بنت، چُش کہ پنجاب اگاں سندھ ءَ؟ بلوچ پُسَگاں پرچہ اے آپتاں چہ گوزگ کپیت؟ سیمی ایش کہ سرکار اے وئیلانی سر ءَ نوٹس پرچہ نہ زیر اِیت؟ اے چارگ بیت کہ اَے وئیل بلوچ رسانکدرانی تہ ءَ مزنیں کچے ءَ شنگ کنگ بیتگ اَنت، ءُ ھمے جُست چِست کنگ بیتگ کہ سرکار پرچہ ھچ پئیمیں گامگیج زیرگ ءَ نہ اِنت؟

بلوچستان ءِ تہءَ وانگ ءُ زانشت پیسر ءَ چہ بازیں جیڑھانی آماچ اِنت۔ 2018-19 ریئل ٹائم اسکول مانیٹرنگ ربود ءِ رد ءَ، بلوچستان ایجوکیشن پروجیکٹ ءِ رد ءَ شنگ بیتگیں یک کتابکے کہ سرکاری وانگجاھانی سرپانکی ءَ کنت، بلوچستان ءَ 15,000 وانگجاہ اَنت۔ رپورٹ ءِ تہءَ وانگجاھانی تہءَ 74% ءِ سرپانکی کنگ بیتگ، کہ سراسر 11,000 اَنت۔ ایشانی آکبت پدرھینگی بیتگ اَنت: 3000 وانگجاہ بند بیتگ اَنت، وھدیکہ ایندگہ 31% بچکانی وانگجاہ ءُ 33% جنکانی وانگجاھانی تہ ءَ بُنکی آسراتی چُش کہ فرنیچر، وانگی، پہ ورگ ءَ سپاھیں آپ، لیبز، پسیل، سپاھیں مکتب، ءُ چہ لائکیں زانشتکاراں چہ زبھر بیتگ اَنت۔

ھما وانگجاھانی تہ ءَ کہ اے آسراتی ھست اَنت ھم اود ءَ ھم جاور ھاس گھتر نہ اَنت۔ سرکاری وانگ ءِ کیلو باز ھراب اِنت، ءُ مات ءُ پِت زر پچارینگ ءُ وتی زھگاں زاتی وانگجاھاں روان دیگ ءِ ھاتر ءَ مزنیں زر ءِ دیگ ءَ ساڑی اَنت۔ بُرزی کچ ءَ وانگ ءُ زانگ ءِ کیلو ءِ ھرابی ءِ بزانت اِنت کہ ھزارانی کچ ءَ نودربر کراچی، اسلام آباد ءُ لاھور ءِ پئیمیں شھرانی نیمگ ءَ جُنز اَنت، کہ اود ءَ الکاپی ءَ ونت بہ کن اَنت۔

اے درستیں جیڑھاں پد ھم، ستکانی وتساچیں پھازوکانی لھتے ٹولیاں وانگجاھانی مان دارگ ءَ گوں جاورانی گیشتر ھراب کنگ ءِ پیسلہ کُتگ۔

وانگجاھانی مان دارگ ءِ پدرد ءَ مزنیں کساسے ءَ لس مھلوک ءِ تہ ءَ گم ءُ زھر ءِ ودی کُتگ۔ نودربر ءُ سول سوسائٹی ءِ باسکانی نیمگ ءَ وانگجاھانی مان دارگ ءَ بگیر ءَ زھرشانی کنان ءَ بلوچستان ءِ جتائیں دمگانی تہ ءَ دگانی سر ءَ در اتکگ اَنت۔

بلوچ اسٹوڈنٹس ایکشن کمیٹی (بی ایس اے سی) اے جھد ءَ درستاں دیم ءَ بیتگ، مردمانی تہ ءَ بیداری تالان کنگ، زھرشانیانی اڈ دیگ، ءُ چاگردی رسانکدر ءَ تکشام جنزینگ ءَ اَنت۔ اوتھل ءَ زھرشانی کنوکانی گُشگ اَت کہ بلوچستان ءِ وانگی بودیشت کساس جیڑھانی آماچ اِنت ءُ وانگجاھانی ما دارگ ایشی ءِ سر ءَ پیٹرول ریچگ ءِ مَٹ اِنت۔ درانگاز کنوکاں ٹاہ دیان ءَ گُشت کہ اے وئیل جتا جتاہ ءُ بے ترتیب نہ اَنت بلکیں تُرس ءُ بیم ودی کنگ ءُ بلوچ ورناھاں چہ وانگ ءَ زبھر کنگ ءِ یک شوربندیں پندل اِنت۔

تربت ءَ، سدانی کچ ءَ زھرشانی کنوک دگانی سرءَ مچ بیتگ اَنت، کہ آیاں پلے کارڈ چِست کُتگ اِت اَنت، ءُ وانگجاھانی مان دارگ ءِ بگیر ءَ اوگام جنگ ءَ اَت اَنت۔ زھرشانی کنوکانی گُشگ اَت کہ بلوچستان ءِ وانگی ربود تباھی ءِ سیمسران اِنت ءُ وانگجاھانی ماندارگ اِشی ءَ پراموشی ءِ نیمگ ءَ برگ ءَ اِنت۔ زھرشانی کنوکاں اَے درگت ءَ سرکار ءِ ھاموشی بے کردی ءِ سرءَ جُست چِست کُتگ۔ زھرشانی کنوکانی گُشگ اَت کہ وانگجاھانی ماندارگ بلوچ راج ءَ چہ وانگ ءَ زبھر کنگ ءِ پندل ءِ بھر اِنت۔

نوکتریں

بلوچستان: یک مردمے زورانسری آوار جنی ءَ پد بیگواہ

سربوتگیں ھالانی رِد ءَ پاکستان ءِ پھازگی لشکر ءَ یک مردمے زورانسری آوار جتگ ءُ بیگواہ کتگ -

عبدالمالک ءِ کُشندھانی یل بوگ پدردی اِنت – کھول

عبدالمالک ءِ کھول ءَ رسانکدراں وتی شنگ کرتگیں درشان ءِ تہ ءَ گوشتگ کہ کتکاراں دوھزار بیست ءُ دو ءِ بیست ءُ...

زورانسری آوار جنیانی بگیری ءَ کراچی ءَ زھرشانی برجاہ

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ نُھ سد ءُ سِی...

ڈیرہ بگٹی ءَ شُد ءِ سوب ءَ سینزدہ سالی ورنا ءَ وتکشی کُتگ

ڈیرہ بگٹی ءِ دمگ سوئی ءَ سینزدہ سالی شُدیکیں ورنایے ءَ ھُشکیں نان ءِ نہ رسگ ءِ سوب ءَ وتی گُٹ وت...