جیڑہ: راجدوستی ءُ زُبان دوستی
نبشتہ کار : شازیہ بلوچ
گُڈی بھر
دی بلوچستان پوسٹ
رُکسار بلوچ : اِنّا من ءَ انچوش لگ ایت بلکیں بلوچی دربرگ گِران اِنت ءُ پہ بلوچی دربرگ ءَ سک جُھد لوٹ ایت، وھد لوٹ ایت! گُڑا تئی گْوشگ ءِ رِد ءَ اگاں من ھر روچ بلوچی دَرونتاں بِوان آں گُڑا من دربر آں؟-
شازیہ بلوچ : بلوچی نبشتہ ءِ دربرگ پہ بلوچ ءَ گِران وَ نہ اِنت، بلوچی مئے وتی راجی ءُ ماتی زُبان اِنت پمیشکا پہ ما بلوچی نبشتہ دربرگ سک آسان اِنت، دومی انچوشکہ بلوچی مئے وتی شھدیں زُبان ءُ راجی پجّار اِنت پمیشکا بلوچی دربرگ ءَ جُھد وَ ناں بلکیں واھگ، مھر ءُ دلبڈی لوٹ ایت۔ باید اِنت ما اشتاپ مہ کن ایں بلکیں پیسر بلوچی دَرونتاں ھورت ءُ دلگوشی ءَ وان این ءُ نبشتہ سْیاھگ ءِ نامگال، کارگال، کُمکّار گال، تپورگال ءُ ستاگالانی وڑیں بُندری چیزاں بہ زان ایں گُڑا ما وت دربر این ءُ زان ایں کہ بلوچی سْیاھگ ءُ نبشتاری چے یے؟-
رُکسار بلوچ : ھو منی دزگْوھار تو راست گْوشگ ءَ ئے باید انت ما چہ ردیاں دلاپ مہ بَہ ایں بلکیں دَرونتاں وانان ءُ نبشتہ بہ کن ایں۔
شازیہ بلوچ : جی ھو! ھمے وڑ اِنت سرجمیں دَرونتانی وانگ ءَ رَند ھر چیزے کہ ما نبیسّ ایں گُڑا دو رَند ءَ وت وتی نبشتگیناں چمشانک بہ دے ایں، وتی ردیاں وت راست بہ کن ایں مستریں گپ ایش انت کہ ما گُلامیں راج ءَ ماں وانگجاھاں وانینگ نہ بیت اگاں ما پیسبُک، ٹیلی گرام ءُ وٹس ایپی گلاں اڈ کنین ءُ وتی لوگ ءُ کُٹم(ھاندان) ءِ مردماں، یا وتی دمک ءِ بلوچاں راجی زُبان ءَ بہ وانین ایں گُڑا بزاں ما پہ راج ءَ چیزے کنگ ءَ ایں چی ءَ کہ اگاں یک راجے زُبان دوست ءُ راجدوست بیتگ گُڑا آ راج وتی گلامی ءُ ایردستی ءَ مار ایت زُبان دوست ءُ راجدوستیں مھلوک وتی راجی گلامی نہ منّ اَنت انچوشکہ بنگلہ دیش مئے دیم ءَ اِنت۔ گُڈی گپ ءَ ما گوں سرجمیں راج دزبندی کن ایں کہ بلوچی بزانت بلد (ڈِکشنری) ءُ بلوچی کیبورڈ ءَ ماں وتی گْوانکواں ایرگیج اِت کہ اِے دْراہ شُمارا چہ گوگل ءَ رس اَنت۔ ماں پیسبُک ءَ بلوچی لینگویج ءِ گلاں ھوار بِہ اِت ءُ وتی سْیاد ءُ سنگتاں ھم اِنوائیٹ بہ کن اِت۔ باید اِنت ما دْراہ وتی راج ءَ بزانت بلد ءُ بلوچی کیبورڈ ءِ ایرگیجگ ءُ کارمرزی ءِ بابت ءَ سرپدی بہ دے ایں اگاں کسے نہ زانت گُڑا جُست بہ کنت ما ھم سرپدی دے ایں۔
رُکسار بلوچ : باز مِنّتوار آں کہ تو من ءَ باز جْوانیں وڑے ءَ سرپدی داتگ۔ نوں من پوہ بیتگ آں کہ اگاں ما دْراہ ھمے داب ءَ جُنزان بہ این ءُ وتی بزگیں بلوچ راج ءَ ماں راجی زُبان ءِ وانگ ءُ زانگ ءَ سرپدی دیان ءَ کُمک بہ کن ایں گُڑا مئے بلوچ راج ءِ راجی زُبان پُشت ءَ نہ روت بلکیں دگریں راجانی زُبان ءِ وڑ ءَ دیمروی کنت۔ چوناھیگا ما بلوچے ایں ءُ بلوچی ما چہ وتی مات ءَ دربُرتگ پمیشکا بلوچی ءَ ما ابرمی سرپد بَہ ایں اگاں ما پہ راجی زُبان ءِ وانگ ءُ نبشتہ دربرگ ءَ جُھد بہ کن ایں گُڑا وت زوت راجی زُبان ءِ وانگ ءُ نبشتہ بَلد بہ ایں بس راجی زُبان ءَ وانگ ءَ ھجبر اوشت ءِ آماچ مہ بَہ ایں گُڑا ما وت دربر ایں ءُ دیم ءَ ھم بہ وانین ایں چی ءَ کہ ما بلوچ ایں ءُ راجی زُبان ءِ ھزمت مئے تیوگیانی راجی زمہ واری اِنت۔ باید انت ما ھر یکے گوں پھر ءُ ناز ءَ وت ءَ راجی زُبان ءِ جُھدکار ءُ ھزمتکار بہ منّ ایں گُڑا ما راجدوست بَہ ایں بلوچی شالا دیمروی کنات ءُ بلوچستان آجو بات۔
ھلاس اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔