گوادر ءَ سرکار ءِ ٹاپار ءُ زمینی راستی

بلوچستان ءِ تیابدپی شھر گوادر ءَ سَے روچاں دگانی سر ءَ دوت، آنسو گیس ءُ جاہ جاہ ءَ ٹائر ماندارگ بیتگ اَنت ءُ بازیں جاھاں برزی پھناتاں تیرگواری ھم کنگ بیتگ اَنت-

شھر ءِ دمک ءُ دراں زھرشانی کنوک جاڑیگ اَنت ءُ سلاہ بندیں لشکر ھم اوشتوک اَنت-

سرکاری ٹاپاراں گوشگ بیتگ کہ گوادر ءِ پورٹ ءَ روکیں راہ سَے روچاں پد پچ بیتگ ءُ گوادر میرین ڈرائیو ءُ پورٹ ءِ راہ ھم پچ بیتگ اَنت-

سرکاری ٹاپاراں پسنی ءِ نندانک ھم ھلاس بیتگ-

سیکورٹی ءِ درگت ءَ ایانی گوشگ ات کہ ایکسپریس وے سربندر کراس ءَ پنچ سد ءُ سید ھاشمی چوک گوادر ءَ چار سد کارندہ دارگ بیتگ اَنت، بوجیگ چوک، الجوھر اسکول ءُ سید ھاشمی دگ ءَ زھرشرنانی کنوک شنگ ءُ شانگ بیتگ اَنت-

سرکاری ٹاپارانی رد ءَ پسنی زیروپوائنٹ، گوادر ملا پازل چوک ءُ گوادر جیٹی ءَ سیکورٹی کارندہ دارگ بیتگ اَنت-

بلے سرکاری ٹاپاراں شھر ءِ جاور شر نہ بیتگ اَنت مروچی چارومی روچ ءَ ھم شھر ءَ ھاسیں نیٹورک نہ بیتگ اَنت-

دی بلوچستان پوسٹ ءِ اھوالکار ءِ رد ءَ شھر ءِ دگانی سر ءَ روانی کم، کار ءُ باری بنجل بند اَنت زھرشانی کنوک پرکاری ءَ اوشتوک اَنت-

زھرشانی کنوکانی دارگ ءِ ھاتر ءَ لشکر بازیں کچے ءَ دگانی سر ءَ بکتربندیں گاڑیاں گوں ترگ ءَ اَنت-

شھر ءَ انٹرنیٹ، بجلی ءُ فون ءِ بندش ءِ سبب ءَ سرکار ءِ ٹاپار گیش کمزور بوگ ءَ اَنت-

حق دو تحریک ءِ رد ءَ پولیس ءِ لٹ ءُ کٹ ءَ چہ اورماڑہ ءَ آیانی باسکے بیران بیتگ-

آیانی رد ءَ چار شمبے ءِ روچ ءَ پرایمنیں زھرشانی ءِ وھد ءَ پولیس ءِ لٹ ءُ کٹاں آیانی باسک دوست مھمد کشگ بیتگ-

زانگ بہ بیت سَے شمبے ءِ روچ ءَ گوادر ءَ پولیس ءُ زھرشانی کنوکانی میان ءَ بیڑانی وھداں یک پولیس کارندھے ءَ تیر لگگ ءَ بیران بیتگ ات کہ آئی ءِ بھتام سروزیر بلوچستان ءَ حق دو تحریک ءِ سر ءَ لڈ اتگ ات ءُ حق دو تحریک ءِ سروک مولانا ھدایت الرھمان ءِ ھلاپ ءَ کوش ءِ ارزی نبشتہ کنگ ءِ گمان داتگ ات-

وزیر داکلہ ضیا لانگو ءَ پریس کانفرنس کنان ءَ گوشتگ ات کہ سی پیک بلوچستان ءِ دیمروی ءِ اِنت بلے مئے مھمان ءُ برات چائنیزانی ھلاپ ءَ مولانا ھدایت الرھمان ءَ درشانانی ھچ اوپار نہ بیت اِنت-

ھمے وڑ “حق دو تحریک” ءَ اے بھتام رد کتگ اَنت آئی ءِ گوشگ ات کہ ترندیں تیرگواری پوج ءِ نیمگ ءَ کنگ بیتگ اَنت آیانی تیرانی نشانگ ءَ آیانی کارندہ بیتگ-

رھشونانی یک درشانے ءَ گوشگ بیتگ کہ وھدیکہ “ڈی سی گوادر نندانک جاہ ءَ اتکگ گڑا آئی ءِ گپانی توک ءَ سرپدی بیتگ نی ایف سی ءُ پوج لیویز ءُ پولیس ءِ پوشاکانی توک ءَ نندانک ءِ مردمانی سر ءَ اُرش کنت دانکہ مردمانی نپرت دمگدارانی سر ءَ بہ بیت ءُ ایف سی ءُ پوج دانکہ پھک بہ بنت-

آیانی گوشگ ءَ ات کہ بازیں جاھاں حق دو تحریک ءِ ھژدہ باسک دزگیر کنگ بیتگ اَنت-

دزگیریانی بارو ءَ حق دو تحریک ءِ یک باسکے ءَ دی بلوچستان پوسٹ ءَ گوں گوشتگ کہ مئے بازیں ھمدرداں لوگاں چہ چست کنگ ءُ برگ ءَ اَنت ءُ بازین چیزاں تاوان دیگ ءَ اَنت-

آئی ءِ رد ءَ کماشیں رھشون حسین واڈیلہ گوں ھمراھانی ھواری ءَ بیگواہ اِنت-

حق دو تحریک ءِ سروک ھدایت الرھمان ءَ گوادر ءِ جاورھالانی زمہ وار سرکار ءِ سر ءَ لڈ اتگ ءُ گوشتگ مردمانی جائزین لوٹانی پور ءَ کنگ ءَ ابید لٹ ءُ کُٹانی راہ ءَ گچین کنگ اِنت-

ھمے وڑ ءَ بلوچستان ءِ سرکار ءَ گوادر ءِ انیگیں جاورھالانی زمہ وار حق دو تحریک ءِ سر ءَ لڈ اتگ ءُ گوشتگ کہ زھرشانی کنوکاں پورٹ ءِ بند کنگ ءِ جھد کتگ گڑا پولیس ءَ کاروائی کنگ کپتگ-

زانگ بہ بیت حق دو تحریک ءِ رھشونانی دزگیری ءُ ایکسپریس وے ءَ تحریک ءِ بنجل ءِ کروجگ ءِ ھلاپ ءَ دوشمبے ءِ روچ ءَ گوادر ءِ شھر ءَ ھوار دمگ ءِ بازیں جاھاں زھرشانی بندات بیتگ اَنت-

زانگ بہ بیت اے زرمبشت ءِ لوٹانی توک ءَ مستریں لوٹ زر ءَ گیرکانونی رنگ ءَ ماھیگانی گرگ ءِ ھلاسی اِنت ءُ زرمبشت ءِ رھشوناں بھتام جتگ کہ استان سندھ ءَ دو ھزار ءِ کچ ءَ ٹرالر بلوچستان ءِ زر ءِ سیمسراں ٹرالنگ کنگ ءَ اَنت-

زرمبشت ءِ رھشونانی گوشگ ات کہ ماھیگانی گیرکانونی شکار ءَ مزنیں جال کارمرد کنگ ءَ اَنت چریشی ءَ نا ایوک ءَ گوادر بلکیں دمگی دریاوردانی کوش بوگ ءَ اِنت ءُ زر ءِ ساھداراں ھم تاوان رسگ اِنت-