امریکہ ءَ جان کُشیں سارتی ءَ سِی ءُ یک مردمانی ساہ گپتگ اَنت

امریکہ زمستانی مولم ءَ توپانی دیمپان اِنت داں انگت ءَ کم چہ کم سِی ءُ یک مردم مرتگ اَنت-

فرانسیسی ھال سرکنوکیں ادارہ اے ایف پی ءِ رد ءَ ترندیں برپگواری ءُ ترندیں ٹھنٹ ءِ سبب ءَ کرسمس ءِ روچ ءَ لکانی ھساب ءَ امریکی پریشان اَنت-

نیویارک ءَ چہ مستریں دومی مزنیں شھر بفیلو اے وھد ءَ ناگیگیانی دیمپان اِنت کہ اود ءَ برپانی توپان ےَ شھر وتی اندر ءَ مانپوش اتگ –

بفیلو ءَ ھشت فٹ دو میٹر چار پوائنٹ برپ مُچ اَنت ءُ بجلی ءِ بندش اے جاوراں ریسکیو ءِ کارمند گیش اسرمندیں جاھاں روگ ءَ لرزگ ءَ اَنت-

بفیلو ءِ جھمنند نیویارک ءِ گورنر کیتھی ھوچول ءِ گوشگ اِنت اے ھنچش اِنت کہ کجا یک جنگجاھیں ھلکے ءَ روگ کپ ایت-

آئی ءَ یکشمبے ءِ بیگاہ ءَ اھوالکاراں گوں تران کنان ءَ گوشتگ کہ اود ءِ جھمنند داں انگت ءَ جان کُشیں جاورانی دیمپان اَنت ءُ آئی ءَ مھلوک ءَ کڈن کتگ کہ لوگانی توک ءَ بہ نند اَنت-

بازیں رودراتکی ریاستاں دو لَک ءَ گیش مردماں کرسمس ابید بجلی ءَ داشتگ ءُ بازیں مردماں موکلانی روچاں سپر کنگ ءِ ارادو رد کتگ اَنت- اے توپان ءِ سبب ءَ کرسمس ءَ لھتے روچ پیش ڈیھ ءِ مزنیں دگ بند اَنت ءُ بالیگ ھم بند کنگ بیتگ اَنت-

سارتی ءِ سبب ءَ نُھ ریاستاں سی ءُ یک مردمانی مرگ ءِ ھال راست کنگ بیتگ اَنت اشانی توک ءَ چار کولوراڈو ءُ دوازدہ نویارک ءَ بیتگ اَنت- واکدارانی رد ءَ بفیلو ءَ کمکی باسکاں گاڑی ءُ برپانی چانگالانی چیر ءَ لاش دزکپتگ اَنت-

شھر ءَ میان اُستمانی بالیگانی بال بند ءُ شھر ءَ ڈرائیونگ کنگ ءِ سر ءَ ھم بندش جنگ بیتگ-

نیویارک ءِ گورنر کیتھی ھوچول ءِ گوشگ اِنت سال دوھزار ءُ بیست ءُ دو ءِ توپان ءِ بارو ءَ نا ایوک ءَ مروچی ءِ نسلانی گپ کنگ بیت اِنت بلکیں اے توپان ءِ زور نوزدہ سد ءُ ھپتاد ءُ ھپت ءِ راجدپتری توپان ءَ گیش اِنت-

بالیگانی چاروکیں ویب سائٹ فلائیٹ اویئر ڈاٹ کام ءِ رد ءَ توپان ءِ سبب ءَ یکشمبے ءِ روچ ءَ دوھزار ءُ چار سد ءَ گیش امریکہ ءِ بالیگ دارگ بیتگ اَنت اشی ءَ ابید شمبے ءِ روچ ءَ سَے ھزار ءُ چار ءُ آدینگ ءِ روچ ءَ شش ھزار دارگ بیتگ اَنت-

اٹلانٹا، شکاگو، ڈینور، ڈیٹرائٹ ءُ نیویارک ءَ ھوار کرسمس ءِ روچاں بالی پٹاں مساپر مھتل اَنت- امریکہ ءِ بجلی ءِ جاورھالانی بارو ءَ سرپدی دیوکیں پراجیکٹ پاور آؤٹیج ڈاٹ یو ایس ءِ رد ءَ شمبے ءِ روچ ءَ کساس ھبدہ لک مردم بجلی ءَ چہ زبھر اَنت-