ایف ڈبلیو او ءُ پاکستانی پوج ءِ سر ءَ اُرش، اُرشانی زمّہ واری بلوچ سلاہ بندیں گلاں منّ اِتگ انت

سربوتگیں ھالانی رِد ءَ گوستگیں شپ ءَ ناشناسیں سلاہ بندیں مردماں بلوچستان ءِ دمگ تجابان ءَ پاکستانی پوج ءِ بنجلے ءِ سر ءَ اُرش کُتگ – اُرش ءَ پاکستانی پوج ءَ جانی تاوان ءِ دیمپانی کنگ کپتگ – اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بی ایل ایف ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ گوشتگ کہ مئے سرمچارں گوستگیں شپ ءِ ادار ھشت ءُ سی ءُ پنچ ءَ تجابان بنجل ءِ سر ءَ راکٹ ءُ نوکتریں سلاھاں گوں اُرش کُتگ –

آئی ءَ گوشتگ کہ سرمچاراں بنجل نزیک ءَ شتگ ءُ نشانگ کتگ چریشی ءَ پوج ءَ جانی ءُ مالی تاوان ءِ دیمپانی بوتگ –

جارکش ءَ گوشتگ کہ دُژمنیں پوج ءُ آئی کمکارانی سر ءَ مئے اُرش بلوچستان ءِ آجوئی ءَ تاں برجاہ مان انت –

دومی نیمگ ءَ گوستگیں روچاں بلوچستان ءِ دمگ ڈیرہ مراد جمالی ءَ بند ساچی کمپنی ایف ڈبلیو او ءِ سر ءَ ھم اُرش کنگ بوتگ –

اُرش بیست نُھ نومبر ءَ ڈیرہ مراد جمالی پٹ فیٹرءَ دگ جوڈ کنوکیں کمپنی ایف ڈبلیو او ءِ سر ءَ کنگ بوتگ اُرش ءِ زمّہ واری بلوچ آجوئی لوٹوکیں سلاہ بندیں گل بلوچ ریپبلکن گارڈ ءَ منّ اِتگ –

بی آر جی ءِ جارکش دوستین بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں بیست ءُ نھ نومبر دوھزار بیست ءُ دو ءِ شپ ءَ ڈیرہ مراد جمالی ءِ پٹ فیٹر ءَ سرکاری دگ ءِ سر ءَ کار کنوکیں کمپنی ایف ڈبلیو او ءِ گاڑی ءُ مشینانی سر ءَ کساں ءُ مزنیں سلاھاں گوں اُرش کُتگ،چریشی ءَ یک ایسیویٹر مشینے ناکارہ بیتگ وھدیکہ آیاں جانی ءُ مالی تاوان ءِ دیمپانی بوتگ –

جارکش ءَ گوشتگ کہ مئے اے دابیں اُرش بلوچستان ءِ آجوئی ءَ تاں برجاہ مان انت –