فیفا ورلڈ کپ: ایران ءَ دو ءُ سینگال ءَ سَے پہ یکے ءَ گوازی کٹ اِتگ انت

دوحہ گتر ءَ برجاھیں فیفا ورلڈ کپ ءِ دوشی چار گوازی کنگ بوتگ کہ آھانی تہ ءَ ایران ءَ ویلز ءِ دیم ءَ دو، سینگال ءَ گتر ءِ دیم ءَ سَے پہ یکے ءَ گوازی کٹ اِتگ انت وھدیکہ نیدر لینڈ ءُ ایکواڈور ءُ امریکہ ءُ انگلینڈ دیمیگ بوتگ انت –

گوستگیں بیگاہ ءَ احمد بن علی فٹبال پٹ ءَ بوتگیں اولی گوازی ایران ءُ ویلز ءِ میان ءَ بوتگ کہ ایران ءَ دو گولاں گوازی کٹ اِتگ – وھدیکہ ویلز ءِ نیمگ ءَ ھچ گول دیگ نہ بوتگ – ایران نیمگ ءَ ھردو گول گوازی ءِ گڈی گیشی ملٹاں داتگ انت کہ آھانی تہ ءَ یک گول ءِ ایران لیبی روزبح چشمی ءُ دومی آر – ریزئین ءَ داتگ انت –

گوستگیں شپ ءَ بوتگیں دومی گوازی ءَ گتر ءُ سینگال ءِ میان ءَ ال تمیمہ فٹبال پٹ ءَ کنگ بوتگ کہ گتر فیفا ورلڈ کپ ءِ دومی گوازی ءَ ھم بے سوب بوتگ – گتر ءُ سینگال ءِ میان ءَ بوتگیں گوازی ءَ سینگال ءِ نیمگ ءَ سَے گول دیگ بوتگ ءُ گتر ءَ یک گول ءِ داتگ –

سینگال ءِ نیمگ ءَ اولی گول گوازی ءِ سی ءُ ھشتمی ملٹی ءَ لیبی بی. دیا ءَ داتگ ءُ پدا دومی ھاپ ءِ گوازی ءِ چِل ءُ ھشتمی ملٹ ءَ لیبی پیمارا ءَ داتگ – دومی ھاپ ءِ ھپتاد ءُ ھشتمی ملٹ ءَ گتر ءِ نیمگ ءَ یک گول ءِ سکور کنگ بوتگ کہ گتر ءِ لیبی محمد منتری ءَ داتگ ءُ پدا گوازی ءِ ھشتاد ءُ چارمی ملٹ ءَ سینگال ءِ لیبی بامبا ءَ داتگ ءُ گوازی وتی ٹیم ءِ نام ءَ کُتگ –

خلیفہ فٹبال پٹ ءَ بوتگیں سیمی گوازی نیدر لینڈ ءُ ایکواڈور ءِ میان ءَ بوتگ کہ ھردو ٹیم یک یک گولے ءَ دیمیگ بوتگ انت –

نیدر لینڈ ءِ نیمگ ءَ اولی گول گوازی ءِ بندات ءَ ششمی ملٹ ءَ دیگ بوتگ کہ لیبی سی – گاکفو ءَ داتگ ءُ ایکواڈور ءِ نیمگ ءَ لیبی ای – ویلنسیا ءَ دومی ھاپ ءِ چِل ءُ نھمی ملٹ ءَ وتی گول اسکور کتگ کہ پدا رند ءَ تاں گوازی ءِ گڈسر ءَ ھچ گول دیگ نہ بوتگ ءُ ھردو ٹیم دیمیگ بوتگ انت –

البیت فٹبال پٹ ءَ دوشی شپ انگلیڈ ءُ امریکہ ءِ میان ءَ بوتگیں گوازی ءَ ھم ھردو ٹیم دیمیگ بوتگ انت – ھردو ٹیمانی نیمگ ءَ ھچ گول اسکور کنگ نہ بوتگ –