کراچی ءَ زورانسری آوار جنگ بوتگیں لالا فہیم بلوچ یل کنگ بوتگ

سندھ ءِ مزن شھر کراچی ءَ چیریں ادارھانی کارمندانی دست ءَ زورانسری آوار جنگ بوتگیں علم ءُ ادب پبلشر ءِ منیجر لالا فہیم بلوچ یل بوتگ ءُ وتی گِس ءَ سربوتگ –

لالا فہیم بلوچ بیست ءُ شش اگست ءَ کراچی ءِ دمگ اردو بازار ءَ چہ وتی جند ءِ دکان “علم ءُ ادب پبلشر” ءَ چیریں ادارھانی کارمنداں آوار جتگ ءُ گوں وت برتگ کہ مروچی یل بوتگ ءُ وتی گِس ءَ سر بوتگ –

زانگ بہ بیت تنی وھدی ھزارانی کچ ءَ بلوچ پاکستانی پوج ءِ چیریں جاھاں بندیگ انت کہ آھانی تہ ءَ کمے کساس ءَ لھتے یل کنگ بیت اِنت ءُ پدا دوسری دگہ بازینے زورانسری آوار جنگ بیگواہ کنگ بنت –

بیگواھیں مردمانی پانکجنیں گل وائس فار بلوچ مسنگ پرسنز ءِ رھشون ماما قدیر بلوچ ءِ رِد ءَ بیگواھیں مردمانی کچ ھزارانی ھساب انت – ما لھتے مردمانی نامانی لڑ کمیشن ءَ دیم داتگ وھدیکہ درسیں مردمانی کھول مئے گور ءَ اتک نہ کن انت ءُ بازینے ترسینگ بیت بلے آ ھر وڑ ءَ دیما بیا انت ءُ گل ءِ گور ءَ وتی کیس ءَ نبشتہ بہ کنائین انت-