زورانسری آوار جنیانی سر ءَ یورپی ءُ اقوام متھدہ ءَ ھم وتی کرد پیلو کنگی انت – ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ ھشت سد ءُ بیست ءُ پنچ روچ سرجم بوتگ انت –

مروچی راجی جرگہ سرکماش اختر شاہ مندوخیل، ملا صادق خوستی ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ زورانسری آوار جنیانی درچ بند کنگ بہ بیت اِنت – بلوچستان ءِ سیاسی جیڑہ پہ تاکت ءَ گیشگیوار نہ بنت ءُ ناکہ توپک ءِ سر ءَ ریاست بلوچستان ءَ فتح کنت –

آئی ءَ گوشتگ کہ ھزارانی کچ ءَ بلوچ راجداریں باسک پاکستانی زنداناں بندیگ انت ازیت سگگ انت ءُ بازینے زندانانی تہ ءَ نمیران بوتگ انت – ریاست ءَ اشانی پسو دیگی انت –

آئی ءَ گوشتگ کہ ھنوگیں کمیشن ءَ چینچو زور ماں آؤکیں وھد ءَ زانگ بیت اِنت بلے بلوچستان ءَ زورانسری آوار جنی سر ءَ میان استمانی انسانی ھکانی گلاں ھوار یورپی یونین ءُ اقوام متھدہ ءَ وتی کرد پیلو کنگی انت –