شبیر بلوچ ءِ زورانسری آوار جنی ءَ شش سال سرجم، ھب ءَ زھرشانی

مروچی سَے شمبے ءِ روچ ءَ بلوچستان ءِ باپاری شھر ھب ءَ بلوچ نودربر رھشون شبیر بلوچ ءِ زورانسری آوار جنی ءِ بگیری ءَ زھرشانی کنگ بوتگ –

کھول ءِ گوشگ انت کہ شبیر بلوچ چار اکتوبر سال دوھزار شانزدہ ءَ تربت ءِ دمگ گورکوپ ءَ پاکستانی پوج ءَ دگہ بیست مردمانی ھمراھی ءَ آوار جتگ ءُ بیگواہ کتگ انت، یک ءُ دو ھپتگ ءَ پد ایندگہ درسیں مردم یل کنگ بوتگ انت بلے شبیر بلوچ ھنگت گار ءُ بیگواھیں ایں آئی ءِ ھچ وڈیں ھال بود نیست –

شبیر بلوچ ءِ کھول ءَ مروچی لسبیلہ پریس کلب ءِ دیم ءَ زھرشانی روانک ءِ کش اِتگ، روانک ءَ بیگواھیں انسانی ھکانی باسک راشد حسین ءِ مات، بیگواھیں عبدالرشید ءُ آسف بلوچ ءِ گھار سائرہ بلوچ، بیگواھیں محمد اسلم ءِ گھار ءُ مات ءَ ھوار دگہ بیگواھیں مردمانی کھول ءَ بھر زرتگ –

روانک ءَ درنگاز کنوکاں زورانسری آوار جنگ بوتگیں وتی دوستیگیں مردمانی اکس گون بوتگ انت ءُ آھاں ھب ءِ بنجاھی شھدگانی سر ءَ گام جتگ ءُ وتی دوستیگیں مردمانی یل کنگ ءِ لوٹ کتگ –

شبیر بلوچ ءِ گھار سیما بلوچ ءِ گوشگ ات کہ من وتی برات شبیر بلوچ ءِ کنائینگے ھاتر ءَ ما مدامی زھرشانی ءُ روانک کشگ ءَ انت، شدکشیں زھرشانی بنجل ءَ ھوار اسلام آباد ءُ شال ءَ نندانک ھم جتگ، سوبائی ءُ وفاقی وزیر ءُ کمیٹیانی باور کنائینگ ءَ ابید ھم مئے برات ءِ ھچ ھال نیست، گوستگیں سال ءَ ملک ءِ مزن وزیر عمران خان گوں ما دچار کپتگ ءُ آئی ءَ مارا باور کنائینتگ کہ منی برات ءَ ھوار ایندگہ بیگواھیں مردمانی یل کنائینگے ھاتر ءَ ملک ءِ ادارھاں گوں گپ جنت، ما پہ انساپ ءِ ھاتر ءَ ھچ وڑیں در یل نداتگ، وڑ وڑ ءَ زھرشانی کتگ بلے ھنچوش سما بیت اے ریاست مئے گوشدارگے وڈا نہ انت –

آئی ءَ گوشتگ کہ شبیر بلوچ ءِ زورانسری آوار جنی ءَ ملکی ءُ میان استمانی انسانی ھکانی ادارھاں چہ ریاستی ادارھاں ھم جواب لوٹ کتگ بلے ھچ وڈیں پسو نہ رستگ –

زورانسری آوار جنگ بوتگیں شبیر بلوچ ءِ کھول ءَ مروچی چہ اے زھرشانی ءَ رسانکدراں داتگیں درشان ءِ تہ ءَ یکرندے پدا ملک ءِ برزی ھاکم ءَ ادارھاں گوں لوٹ کتگ کہ شبیر بلوچ زاھر کنگ بہ بیت ءُ آئی ءَ انساپ دیگ بہ بیت، اگاں آئی ءِ سر ءَ الزام ءِ ھست گڑا ملک ءِ جوڈ کتگیں آمیدگساں آرگ بہ بیت ءُ آئی ءِ کتکاری زاھر کنگ بہ بیت پدا آئی تُری سزا بہ دئینت بلے اے وڈ بید کتکاری ءَ سالانی سال بیگواہ کنگ ءُ آئی ءَ ازیت دیگ ءَ مارا درد ءُ رنجانی آماچ مہ کن انت – مروچی مئے اے زھرشانی ءِ مول مراد چہ ملک ءِ ادارھاں انساپ ءِ لوٹ کنگ انت ما چہ اے ریاست ءَ کانود ءُ رھبندانی رِد ءَ وتی دوستیگیں مردمانی وش ءُ سلامتی یل کنگ ءِ لوٹ ءَ کن ایں ما ھمے ھک ءِ لوٹ ءَ کن ایں کہ ریاست ءَ وتی شھری ءَ دیگی انت، پرچاکہ چہ یک مردمے ءِ زورانسری آوار جنی ءَ آئی سرجمیں کھول ازاب ءِ آماچ بیت اِنت –

آئی ءَ گوشتگ کہ ما گوستگیں ماہ ءَ شال ریڈ زون ءَ گورنر کارگِس ءِ دیم ءَ پنجاہ روچاں ایمنیں زھرشانی کتگ بوتگ – ما وتی زھرشانی نندانک سرکاری وفاقی کمیٹی ءِ باور کنائینگ ءَ پد ھمے واست ءَ ھلاس کتگ کہ مئے مردم یل کنگ بنت، مروچی آ کول کرار ءَ ماھے پرگوستگ بلے تنی وھدی مئے مردمانی وش ءُ سلامتی ءِ ھچ وڈیں ھال اھوال نیست اِنت –