مستونگ ءَ پاکستانی پوج ءِ سر ءَ اُرش کنگ بیتگ یک کارندھے ٹپی بوتگ

بلوچستان ءِ بُنجاھی شھر شال ءَ چہ ھمگرنچیں دمگ مستونگ ءَ سلاہ بنداں پاکستانی پوج چوکی گوں دزبمب ءَ نشانگ کتگ-

سربوتگیں ھالانی رِد ءَ مستونگ ءَ کیڈٹ کالج کراس سر ءَ پاکستانی پوج ءِ چوکی سر ءَ دزبمب اُرش ءَ یک کارندھے ٹپی بیتگ- اُرش ءَ پد آ دگہ کارندھاں تُرندیں تیرگواری کتگ-

اِھوالکارانی رِد ءَ سلاہ بندیں مردم تچگ ءَ سوبمند بیتگ اَنت وھدے کہ پوج ءَ دمگ انگر ءَ کتگ اُرشکارانی پٹ ءُ پول بندات کتگ-

اُرش ءَ ٹپی ئیں کارندہ پوج ءَ پہ الاج ھاتر ءَ نادُراھجاہ برتگ-

زانگ بہ بیت اے دمگ ءَ آجوئی لوٹوکیں گل ھست اَنت بلے مرچگیں اُرش زمہ واری ھچ گل ءَ نہ زرتگ-