بلوچ نودربر ملکاری ءِ پِڑ ءَ وتی راجی ذمہ واریاں سرپد بہ بنت ءُ راج دوستی ءِ لوٹاں سرجم بہ کن اَنت۔ بلوچ اسٹوڈنٹس فرنٹ
24/09/2022 بلوچ اسٹوڈنٹس فرنٹ ھب ھنکین ءِ ھنکینی لس مجلس ءِ دیوان ھنکینی کماش ھمل بلوچ ءِ سروکی ءَ برجم دارگ بوتگ، اے دیوان ءِ مھمان ءِ ھاس بُنجاھی کمک کماش طارق بروت ءُ گچینی مھمان بنجاھی پتّر ءِ باسک سنگت فضل بلوچ بوتگ۔ دیوان ءِ تہ ءَ بنجاھی سرکولر ، گْوستگیں کارکردگی اھوال، گل ءِ کار ( تنظیمی امور) ، میان اُستمانی ءُ ھَندی جاور ھال، شرگداری ءُ آیوکیں گامگیجانی سرھال ءِ سر ءَ باوست کنگ بوتگ۔
دیوان ءِ تہ ءَ گل ءِ بنجاھی رھشوناں تران کنان ءَ گْوشت کہ بلوچ اسٹوڈنٹس فرنٹ یک نودربر گلے کہ آ راج دوستی ءِ لیکہ ءِ سر ءَ کار کنگ ءَ اِنت۔ آئی ءِ مول ءُ مراد اِلم ءُ زانِشتی ءُ ملکاری ءِ پِڑ ءَ بلوچ نودربرانی تربیت کنگ اِنت، تاںکہ نودربر باندات ءِ روچ ءَ راج ءِ دیمروئی ءِ ھاتِر ءَ جْوانیں کِردے پیلو کرت بہ کن اَنت۔ نوں اے نودربرانی راجی ذمہ واری اِنت کہ ملکاری ءَ شرّیں وڑے ءَ بھر بہ زُور اَنت داںکہ وتی راجی ذمہ واریاں سرپد بہ بنت ءُ راج دوستی ءِ لوٹاں سرجم بہ کن اَنت۔
دیمتر ءَ دیوان بھر زیروکیں مردماں تران کنان ءَ گْوشت کہ مرچی دگنیا پہ وتی نپ ءُ سیتانی ءُ ایر دستیں راجانی اگبالانی دائمی ایر موش کنگ ءِ ھاتر ءَ وڑ وڑیں پندل سازگ ءَ اَنت۔ اگاں اے درگت ءَ نِزور ءُ ایر دستیں راجانی نودربراں سما نہ کرت ءُ وتی ذمہ واریاں سرپد نہ بوت اَنت گڑا بِہ گِند ئے زوراوریں ڈیھ کمزوریں راجانی ھستانک ءَ چہ دگنیا ءِ نکشاہ ءِ سر ءَ ھلاس بہ کن اَنت۔
آیوکیں سرھال ءِ تہ ءَ گْوستگیں ھنکینی جوڑشت ھلاس کنگ بوت ءُ نوکیں ھنکینی جوڑشت گچین کاری ءِ وسیلہ ءَ جْوڑ کنگ بوت، ھمل بلوچ ھنکینی کماش ، معراج بلوچ ھنکینی کمک کماش ، ساھل بلوچ ھنکینی کارگشاد ، الطاف بلوچ ھنکینی کمک کارگشاد ءُ یاسر بلوچ ھنکینی شنگکار گچین کنگ بوت اَنت۔
دیوان ءِ گڈسر ءَ بنجاھی کمک کماش طارق بروت ءَ ھنکینی سنگتاناں سوگِند دات ءُ سنگتاں گل ءِ کارانی دیمروی ءِ ھاتر ءَ اے اھد کرت کہ پہ گل ءِ کارانی دیمروی ءَ وتی جھد جْوانیں رنگے ءَ برجم دار اَنت۔