شام ءِ زر ءَ یک دردناکیں وئیلے پیش اتکگ کہ اود ءَ درانڈیھاں روکیں بوجیگ بڈ اتگ ءُ ھپتاد ءُ یک مردم بیران بیتگ اَنت-
درملکی رسانکدر ءِ رد ءَ وئیل پشمبے ءَ پیش اتکگ کہ بوجیگ ءَ یک سد ءُ بیست ءُ چہ یک سد ءُ پنجاہ مردم لبنانی، شامی ءُ فلسطینی سوار بیتگ اَنت کہ آیانی تہ ءَ زالبول ءُ زھگ ھوار اَنت-
واکداراں ھپتاد ءُ یک مردمانی لاش در کتگ اَنت ءُ رکیتگیناں بیست مردم نادراہ جاہ ءَ سر کنگ بیتگ اَنت، آ دگرانی شوھاز برجاہ اِنت، ریسکیو ءِ کارمندانی رد ءَ وئیل ءِ سبب زانگ نہ بیتگ-
واکدارانی گوشگ اِنت بوجیگ لبنان ءِ دکو ءِ نزیک ءَ منیہ شھر ءَ روگ ءَ بیتگ ءُ گمان ھمے بیت کہ اے یورپ ءَ روگ ءَ بیتگ –