بلوچستان: سِی ءُ ھشت ھزار مردم وبائی نادراھیانی آماچ

بلوچستان ءَ ھار آماچیں دمگاں بازیں وبائی نادراھی ءِ تالان بوتگ کہ ھپتگے ءِ میان ءَ ڈائریا، دل ءُ لاپ، ملیریا، چم ءُ پوست ءِ نادراھی ءَ ھوار ساہ ءِ نادراھی ءُ دگہ نادراھیانی سِی ءُ ھشت ھزار کیس رپورٹ بوتگ انت –

بلوچستان سرکار ءِ کچ ءُ کساس ءِ رِد ءَ بلوچستان ءَ ھار آماچیں سِی ءُ یک دمگاں وبائی نادراھی اتکگ انت ءُ اشانی تہءَ درساں گیشتر لسبیلہ، نصیر آباد، کچھی، جھل مگسی،صحبت پور، شال، قلعہ سیف اللہ، نوشکی، ھزدار، ڈیرہ بگٹی، چمن، قلعہ عبداللہ ءِ مردم نادراھیانی آماچ انت کہ اے نادراھی تیزی ءَ گوں شنگ تالان بوگ ءَ انت –

سرکاری کچ ءُ کساس ءِ رِد ءَ بلوچستان ءَ ھار آماچیں دمگانی تہ ءَ پانزدہ ستمبر ءَ بگر تاں بیست ءُ دو ستمبر ءَ ڈائریا ءِ دہ ھزار ءُ شش سد ءُ شست، دل ءُ لاپ ءِ شش سد ءُ ھپتاد ءُ چار، ساہ ءِ یانزدہ ھزار ءُ یک سد ءُ ھشت، پوست ءِ دھ ھزار ءُ چارسدءُ سِی ءُ پنچ، چمانی انفیکشن یک ھزار ءُ دوسد ءُ سِی، ملیریا ءِ سَے ھزار ءُ شش سد ءُ ھشتاد ءُ شش، ٹائیفائیڈ ءِ یکسد ءُ بیست ءُ چار، زردویگ ءِ سِی ءُ سَے وھدیکہ ڈینگی نادراھی ءِ دہ کیس رپورٹ بوتگ انت –

رپورٹ ءِ رِد ءَ جانسلامتی ءِ واکدارانی نیمگ ءَ ھار آماچیں دمگاں میڈیکل بنجل اڈ دیگ بوگ ءَ انت تنی وھدی سرجمی ءَ دوھزار ءُ یک سد ءُ چِل ءُ ھپت بنجلاں پنچ لک ءُ دوازدہ ھزار مردمانی الاج بوگ ءَ انت –

زانگ بہ بیت ھئور ءُ ھاراں بلوچستان ءَ سِی ءُ پنچ دمگ سانمند بوتگ انت – پی ڈی ایم اے ءِ رِد ءَ بلوچستان ءَ توپان ءِ سوب ءَ سَے سد مردم بیران بوتگ انت بلے سرکاری رپورٹ ابید بلوچستان ءَ ھئور ءُ ھاراں بیران بوتگیں مردمانی کچ گیش انت –

سرکار ءِ رِد ءَ بلوچستان ءَ ھئور ءُ ھاراں سینزدہ لک ءَ گیش مردم بے گس بوتگ انت – یک لک ءُ ھشتاد ءُ پنچ ھزار ءَ گیش گس کپتگ انت یا آھاں سک باز تاوان بوتگ – بلوچستان ءَ بوتگیں بشی ھئوراں پد ھار آماچیں دمگانی مھلوک تنی وھدی پیشی وڈا زند گوزینگ ءَ نہ انت –

ھمے زوتاں بوتگیں ھئوراں چی بلوچستان درساں گیشتر اثرمند بوتگ بلے پدا ھم سرکار ءُ واکدارانی کار سستی ءِ آماچ انت ھئور ءُ ھارانی سوب ءَ بلوچستان ءَ بیران بوتگیں مردمانی کچ تنی وھدی سرجمی ءَ پکا نہ بوتگ انت وھدیکہ چہ بلوچستان ءَ دومی جاھاں رؤگے ھاتر ءَ ریل ءِ پاٹک ءُ دگ تنی وھدی شر کنگ نہ بوتگ انت اے درگت ءَ واکدار سرجمی ءَ بے سوب انت –