کیچ: جنکے ءَ ھوار دو مردماں وتکشی کتگ

بلوچستان ءِ دمگ کیچ ءَ جنکے ءَ ھوار یک ورنایے ءَ وتکشی کتگ –

گیشیں ھالانی رد ءَ کیچ ءِ دمگ ھوشاپ ءَ یک جنکے ءَ وتکشی کتگ ءُ وتی زند ھلاس کتگ-

وتکشی کنوکیں جنک ءِ پجار ھبدہ سالی ئیں صبا نور ء ولی مھمد ءِ نام ءَ زانگ بیتگ-

دمگی مردمانی رد ءَ وتکشی ءِ سبب ءَ لوگی جیڑھانی سر ءَ بیتگ ءُ چریشی ءَ جنک ءَ وتی لوگ ءَ وتکشی کتگ-

ھمے وڑ گوادر ءُ تربت ءِ میانی دمگ نگور کلانچ ءَ ھم یک ورنایے ءَ وتکشی کتگ-

ورنا ءِ پجار مھید ءِ نام ءَ زانگ بیتگ کہ آئی ءَ مروچی وتکشی کتگ-

اے دمگ ءَ وتکشی ءِ اے دومی وئیل اِنت کہ مروچی پیش اتکگ اَنت-

بلوچستان ءَ چیزے ماھانی تہ ءَ وتکشی ءِ وئیل بے کساس گیش بیتگ اَنت کمی ءِ نام ءَ نزانگ ءَ اَنت ھمک وھد وھد گیش بیان اَنت-

زانگ بہ بیت ھمے ماہ ءَ بلوچستان ءَ وتکشی ءِ اے ششمی وئیل اِنت کہ پیش آیگ ءَ اَنت –

گوستگیں روچاں بلوچستان ءَ وتکشی ءِ سر ءَ تربت یونیورسٹی ءَ یک روچی مراگشے برجم دارگ بیتگ ات کہ مراگش ءَ گوشگ بیتگ ات وتکشی گیشتر ڈپریشن ءِ سبب ءَ پیش آیگ ءَ اَنت چریشی ءِ گر ءُ دار کنگ المی اِنت-