بلوچستان لبریشن فرنٹ ءَ گْوادر ءِ ھند جیونی ءَ پاکستان ءِ زِر لشکر (بحری فوج) کوسٹ گارڈ ءِ سر ءَ دستی بمب اُرش ءِ زِمہ واری منّ اِتگ۔
بلوچستان لبریشن فرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشان ءِ تہ ءَ گْوشتگ کہ یازدہ تُومشان (11 ستمبر) یکشمبے ءِ روچ ادار نُھ ءُ چِل مِلٹ ءَ گْوادر ءِ ھند جیونی ءَ مئے سرمچاراں پاکستان ءِ زِر لشکر (بحری فوج) ءِ ادارہ کوسٹ گارڈ ءِ سر ءَ جیونی ءِ تیاب دپ ءَ ھمے ساھت ءَ اُرش کُتگ کہ آ زِر ءِ کِنارگ ءَ بوجیگ ءَ سوار بوتگ اَنت۔ اُرش ءِ آسر ءَ دوئیں کارمند سک ءَ زدگ ءُ ٹپّی بوتگ اَنت۔
آئی وتی درشان ءِ دیمتِر ءَ گْوشتگ کہ بوجیگ ءَ سواریں کارمنداں ابید تیاب دپ ءَ دِگہ کوسٹ گارڈ ءِ کارمند ھم ساڑی بوتگ کہ آ ھر بیگاہ ماھی گِر ءُ گولڈ سمتھ لائن ءِ سِیمسر ءَ کارکنوکیں پوریاگِراں ھرروچ سُنگ گِر اَنت۔
جارکشّ ءَ دیمتِر ءَ گْوشتگ کہ کوسٹ گارڈ پاکستان ءِ زِر لشکر (بحریہ) ءَ گوں ھمگْرنچیں ادارھے کہ آ زُورگِپتیں بلوچستان ءِ زِر، بلوچ ماھی گِر ءُ پوریاگِراناں ھرروچ مُدامیگیں وڑ ءَ سُنگ گِر اَنت۔ چہ گُجّو (ٹرالرز مافیا) کنوکاں سُنگ گِر اَنت ءُ چہ رھبند ءَ در زُورگِپتیں بلوچستان ءَ زِر ءَ گُجّو (ٹرالنگ) کن اَنت۔ اے گُجّو (ٹرالنگ) کنگ ءَ چینی شِرکت ءِ ٹرالر ھم ھوار اَنت کہ آ بلوچستان ءِ زِری زِندمان (سمندری حیات) ءِ چُکچینی ءَ کنگ ءَ اَنت ءُ ماھی گِراناں پہ چُنڈے نگن ءَ زِبھر کنگ ءَ اَنت۔
جارکشّ ءَ وتی درشان ءِ دیمتِر ءَ گْوشتگ کہ چین وتی واپاری ءِ شونداتانی نام ءَ بلوچستان ءَ پاکستان ءِ کُمکّ ءَ لشکری بُنجل (عسکری بیس) جوڑ کنگ ءَ اِنت کہ آ اے دمگ ءِ توان ءِ ھراب کنگ ءِ کُوشستے۔ پاکستان ءُ چین ءِ ساڑی بُوَگ بلوچ راج ءَ ھوار اے دمگ ءِ اے دِگہ مُلکانی واستا ھم ھترھے۔ مئے اُرش پاکستان ءُ چین ءِ رنگیں زُورگریں توانانی واستا کلوھے کہ بلوچ سرمچار وتی سرڈگار، زِر ءُ گْواجنانی پاسپانی کنگ زانت۔
جارکشّ ءَ درشان ءِ گُڈّی ءَ گْوشتگ کہ داں زُورگِپتیں بلوچستان ءِ آجوئی ءَ مئے اے اُرش گوں تْرندی ءَ برجاہ بَہ اَنت۔