پاکستان ءِ وزیر داخلہ ءِ گند ءُ نند ءَ پد شال ءِ ریڈ زون ءِ زھرشانی نندانک ھلاس

بلوچستان ءِ بنجاھی شھر شال ءِ ریڈ زون ءَ گورنر کارگس ءِ دیم ءَ زورانسری آوار جنگ بوتگیں بلوچ سیاسی باسکانی کھولانی نندانک مروچی پنجاھمی روچ ءَ پاکستان ءِ وزیر داخلہ رانا ثنا اللہ ءِ گند ءُ نند ءَ پد ھلاس کنگ بوتگ –

ھمے سال ءِ جولائی ماہ ءَ زیارت ءَ دروگیں میڑ ءِ نام ءَ زورانسری آوار جنگ بوتگیں مردمانی کوش ءِ بگیری ءَ بیگواھیں مردمانی کھولاں شال ءِ ریڈ زون ءَ نندانک جتگ ءُ وتی دوستیگیں مردمانی وش ءُ سلامتی یل کنگ ءِ لوٹ کتگ – آھاں لوٹ کتگ کہ زیارت وئیل ءِ بگیری ءَ جوڈیشل کمیٹی ءِ اد دیگ بہ بیت ءُ بیگواھیں مردمانی کھول باور کنائینگ بہ بنت کہ مروچیگ ءَ پد ھچ کس دروگیں میڑے نام ءَ جنگ نہ بیت اِنت –

بلے پدا ھم برزی تبک ءِ سرکار ءِ نادلگوشی ءُ گامگیج نہ زورگ ءِ سوب ءَ اے نندانک پنجاہ روچاں تاں برجاہ بوتگ ءُ اے میان ءَ ترندیں ھئورانی سوب ءَ بیگواھیں مردمانی کھول سک باز دلسیاہ بوتگ انت ءُ بازیں کھولے نادراہ بوتگ انت –

بلوچستان ءِ جتا جتائیں ھند ءُ دمگاں زورانسری آوار جنگ بوتگیں مردمانی مات ءُ دگہ کس ءُ وارساں نندانک ءَ بھر زرتگ ءُ چہ سرکار ءَ وتی لوٹانی منارینگ ءِ اپیل کرتگ –

مروچی پاکستان ءِ وزیر داخلہ رانا سناء اللہ ءِ چیردستی ءَ برزی تبک ءِ ٹولی ءَ بیگواھیں مردمانی کھولاں گوں گند ءُ نند کتگ ءُ آھاں نندانک ءِ ھلاس کنگے لوٹ ھم کتگ – اے سرکاری ٹولی ءَ بلوچستان نیشنل پاٹی ءُ باپ ءِ وزیر ھم ھوار بوتگ انت –

ھمے وھد ءَ بیگواھیں مردمانی کھولانی گوشگ ات کہ مئے لوٹاں شما وت سرپد ات کہ ما چی لوٹ ایں اگاں مئے مردماں کتکاری ءِ کتگ گڈا آ آمیدگس ءَ آرگ بہ بنت – اگاں شما وتی آمیدگسانی سر ءَ اوست ندارے گڈا ما کجا بہ رو ایں ؟

آھانی گوشگ ات کہ ادا بیگواھیں مردمانی مات ءُ گھار نشتگ انت اے باور کنائینگ بہ بنت کہ اشانی دوستیگیں مردمانی جون چگل دیگ نہ بنت –

بیگواھیں مردمانی کھولاں سرکاری ٹولی ءِ گوم گند ءُ نند ءُ پدا آھانی باور کنائینگ ءَ پد زھرشانی نندانک ءِ ھلاس کنگ ءِ جار جتگ ءُ گوشتگ کہ اگاں مئے لوٹانی سر ءَ گامگیج زورگ نہ بوت گڈا دیمتر ءَ ترندتریں زھرشانی کنگ ءِ راہ ءَ گچین کن ایں –