شال: بیگواھیں مردمانی کھولاں زھرشانی کنان ءَ شھدگ بند کرتگ انت

بیگواھیں مردمانی کھولاں چِل ءُ چار روچ سرجم انت کہ ریڈ زون ءَ نندانک ءَ نشتگ انت –

گوستگیں چِل ءُ چار روچاں شال ریڈ زون ءَ گورنر کارگس ءِ دیم ءَ اے نندانک یکشل ءَ برجاہ انت آھانی لوٹ انت کہ مردمانی زورانسری آوارجنی دارگ بہ بیت، مئے دوستیگیں مردم یل کنگ بہ انت ءُ زیارت ءِ وئیل ءِ سر ءَ جوڈیشنل کمیٹی ءِ اڈ دیگ بہ بیت –

زھرشانی ءَ بیگواھیں مردمانی کھولاں ھوار سیاسی ءُ چاگردی باسک، نودربر گلانی باسک ھم ھوار انت –

زھرشانی کنوکاں وتی لوٹانی ھک ءَ مروچی شال ءِ رش تریں شھدگانی سر ءَ نندانک جتگ ءُ دگ سر ءَ ھر وڈیں رؤگ آیگ بند کُتگ چریشی ءَ سرجمیں شھر ءَ ٹریفک جام بوتگ –

زھرشانی کنوک مروچی سھب ءَ مزنیں کچے ءَ سوبائی سیکٹریٹ ءِ نزیک ءَ یکجاہ بوتگ انت ءُ آھاں جی پی او چار راہ ءُ سرینہ ھوٹل ءَ رؤکیں دگانی سر ءَ اڈاند پیداک کتگ ءُ بند کرتگ انت – زھرشانی کنوکانی گوشگ انت کہ سرکار ءُ سول واکدار آھاں لوٹانی سر ءَ ھچ وڈیں گامگیج زورگ ءَ نہ انت –

درنگاز کنوکانی گوشگ انت کہ چِل ءُ سَے روچ انت کہ یکشل ءَ شپ ءُروچ پچیں آزمان ءِ چیر ءَ نشتگ انت، ھپتگے ءَ تاں ترندین ھئوراں یکشل ءَ گورتگ چریشی ءِ سوب ءَ تمبوانی تہ ءَ نشتگیں کھولانی جاور نگیگ بوان انت بلے ھنگت واکداراں وتی زمہ داریانی احساس نیست انت ھمے سوب ءَ بیگواھیں مردمانی کھول لاچار انت ترندیں گامگیج چست بہ کن ات –

دومی نیمگ ءَ زھرشانی نندانک ءِ میان ءَ لھتے دمگی مردماں اڈاند پروشگے جھد کتگ بلے زھرشانی ھواریں مردین، چک ءُ زالبولاں گاڑیانی دیم ءَ وپتگ ءُ وتی زھرشانی نبشتہ کنائینتگ –

درنگاز کنوکانی گوشگ انت کہ بیگواھیں مردمانی کھولاں درد ءُ اندوھانی امیت ءِ زرتگ ءُ اتکگ انت شال ءِ دگانی سر ءَ نشتگ انت تانکہ آھانی نمائندگ آھاں گوش بہ دار انت بلے سرکار سنجیدگ نہ ایں وھدیکہ دومی نیمگ ءَ مئے جندے دمگے مردم مئے سرا وتی گاڈیانی گوازینگے جھد ءَ انت –

درنگاز کنوکانی گوشگ ات کہ ما سک باز لاچار انت کہ دگاں بند کن ایں پرچاکہ سرکار ھچ وڈا مئے لوٹانی منگ ءَ سنجیدگ نہ انت، مھلوک ءَ گوں دزبندی انت کہ اے زورانسری آوار جنی ءِ جیڑہ سرجمیں راج ءِ جیڑہ انت بائد انت مئے توار جوڈ بہ بہ یے –

درنگاز کنوکانی گوشگ ات کہ اشی ءَ دگ ءِ بند کنگے گامگیج سر ءَ کھولانی گوم ءَ گند ءُ نند بوتگ جیڑھے گیشگیواری ءِ کول کنگ بوتگ بلے سول واکدار وتی زمہ داری ءُ کولاں پدکنز بوتگ ءُ ھچ وڈیں گامگیج ءِ نہ زرتگ –