بیگواھیں لالا فھیم ءِ زورانسری آوار جنی، ایف آئی آر چار روچ ءَ پد نبشتہ کنگ بیتگ

اھوالکار لالا فھیم بلوچ ءِ آوار جنی ءِ ایف آئی آر چار روچ ءَ پد پریڈی تھانہ ءَ نبشتگ کنگ بیتگ-

بیگواھیں فھیم بلوچ ءِ ناکو زھگ ام حبیبہ ایڈوکیٹ ءِ گوشگ ءَ ایف آئی آر نبشتگ کنگ بیتگ – دو شمبے ءِ سھب ءَ اھوالکار، پبلشرز، ندکار، سیاسی ءُ انسانی ھکانی رھشون بازیں کچے ءَ کراچی ءَ پریڈی تھانہ ءَ ایف آئی ار ءِ نبشتگ کنگ ءَ سر بیتگ اَنت-

تھانہ ءَ ایف آئی ار ءِ نبشتہ کنوکاں لالا فھیم بلوچ ءِ برات کریم جان بلوچ ءُ ناکو زتک حبیبہ ایڈوکیٹ،بلوچ یکجھتی کمیٹی کراچی ءِ آرگنائزر آمنہ بلوچ، انسانی ھکانی رھشون قاضی خضر، پروین ناز، پبلشرز جمیل امام، سرفراز بلوچ ءُ دگہ سیاسی ءُ چاگردی مردم ھوار بیتگ اَنت-

زانگ بہ بیت کراچی ءِ دمگ اردو بازار ءَ بیست ءُ شش اگست دوھزار ءُ بیست ءُ دو ءِ بیگاہ ءَ علم و ادب پبلشرز ءِ دکان ءَ لالا فھیم بلوچ کانوداریں کارندھاں وتی ھمراھی ءَ برتگ ات – چریشی ءَ پد اے وئیل ءِ سی سی ٹی وی فوٹیج ھم دیم ءَ اتکگ اَنت – فوٹیجاں گندگ بیت اِنت کہ سندھ پولیس ءُ لھتے لس پوشاکی کارندہ آئی ءَ علم و ادب ءِ دپتر ءَ چہ برگ ءَ اَنت-

علم و ادب پبلشرز پاکستان ءِ پھناتاں یک نامی ئیں پبلشنگ ھاؤسے کہ اود ءُ بلوچی ءُ اردو ادب ءِ پٹ ءُ پولی کتاب چھاپ بنت-

لالا فھیم بنکی ءَ بلوچستان ءِ دمگ پنجگور ءِ ھند وشبود ءِ نندوک اِنت آ علم و ادب ءِ پبلشنگ ھاوس ءِ مینیجر اِنت ءُ ھمے وڑ صدائے بلوچستان ڈاٹ کم ءُ سے ماھی گدان پنجگور ءِ ایڈیٹر اِنت-

فھیم ءِ یل کنگ ءِ درگت ءَ فھیم ءِ کھول ءَ اھوالکاری، پبلشرز، سیاسی ءُ انسانی ھکانی رھشوناں گوں گپ ءُ تران کرتگ – آئی ءِ یل کنائینگ ءِ ھاتر ءُ پریس کانفرنس ءَ ھوار ھوار زھرشانی سر ءَ ھم گامگیج زورگ ءِ چار ءُ ٹپاس اش کتگ- آمیدگس ءَ ھم آئی ءِ یل کنائینگ ءَ روگ بیت اِنت-