بلوچ اسٹوڈنٹس ایکشن کمیٹی کراچی ھنکین ءِ نیاد ھنکینی سرکماش پیرجان بلوچ ءِ چیردستی ءَ برجم دارگ بوتگ ، دیوان ءِ گچینی مھمان بنجاھی پتر ءِ باسک وحید بلوچ بوتگ – دیوان ءَ گوستگیں کار، شرگداری، گل ءِ کار، ھندی ءُ میان استمانی راجکاری ءُجاورھال ءُ آؤکیں گامگیج ءِ بنگپانی سر ءَ گپ ءُ تران ءُ نوکیں کابینھے گچین کنگ بوتگ انت – نوکیں کابینہ ءَ فوزیہ بلوچ ھنکینی سرکماش ءُ وھدیکہ زکریہ بلوچ ھنکین ءِ جنرل سیکرٹری گچین کنگ بوتگ انت –
دیوان ءَ تران کنان ءَ بنجاھی پتر ءِ باسک وحید بلوچ ءَ گوشتگ کہ ھستیں وھد ءَ بساک بلوچ نودربرانی ترجمان ءِ دروشم ءَ زانگ بیت کہ گل نودربرانی تبک ءَ زانشتی، راجکاری ءُ لبزانکی برجم داران ءُ چاگرد ءِ تہ ءَ گپ باوست ءَ دیمروئی دیگ ءِ جھد ءَ کنگ ءَ انت ءُ ھمے وڑ بلوچ راج ءِ سر ءَ کپتگیں قدرتی آزاباں چہ مھلوک بوتگیں تاواناں پُر کنگے ھاتر ءَ ھم وتی جھد ءَ کنگ ءَ انت یک ھنچیں وھد ءَ کہ ھستیں وھدے تاکتوراں بلوچ راج ھما ازابانی تہ ءَ یل داتگ گڈا اے مارا وتی راجی ڈبہ ءِ سرپد بوھگ ءُ اشی ءِ سر ءَ گیش ءَ گیش جھد کنگی انت – بلوچ راج دوستی ءِ منوگریں نودربر گل ءِ دروشم ءَ مارا مدامی وتی راج ءِ ھمکوپگ بوھگ ءُ جھد کنگی انت –
آئی ءَ گوشتگ کہ بلوچ چاگرد ءِ تہ ءَ زانشتی لبزانکی دگہ دیمروئی کاراں دیما برگ ءِ ھاتر ءَ لٹریچر شنگ کنگ بوگ ءَ انت ءُ دومی نیمگ ءَ سرجمیں بلوچستان ءَ مراگش اڈ دیگ بوگ ءَ انت تانکہ بلوچ ورنا ءُ بلوچ راج ءِ زانت ءُ زانشت ءَ سر ریچ بہ بیت ءُ وتی راجی دیمروئی ءَ وتی کرد ءَ پیلو بہ کن انت – ما ھمے ورنایانی پدریچ ءَ بلوچ راج ءِ باندات سرپد بہ ایں ءُ مارا باور ایں کہ زانت سر ریچیں اے ورنا آؤکیں وھد ءَ پہ چاگرد ءَ جوانیں کرد پیلو کن انت – یک نودربر ءِ بوھگ ءَ مارا لوٹیت وتی دلگوش ءَ گیش ءَ چہ گیش گوں کتاباں بہ کن ایں پرچاکہ ھمے کتاب ماراشریں زانت ءُ زانشت دات کرت کناں –
دیوان ءَ جتا جتائیں بنگپانی سر ءَ تران کنگ ءَ پد آؤکیں گامگیج ءِ بنگپ ءَ نوکیں کابینہ گچین کنگ بوت انت کہ فوزیہ بلوچ ھنکینی سرکماش، جاوید کمک سرکماش، زکریا اسمائیل جنرل سیکٹری، ابراھیم بلوچ ڈپٹی جنرل سیکٹری ءُ رضوان بلوچ انفارمیشن سیکٹری گچین کنگ بوتگ انت – بنجاھی پتر ءِ باسک وحید بلوچ ءَ نوک گچین کنگ بوتگیں اگدہ دار سوگند داتگ ءُ گل ءِ اگدہ داراں گل ءِ کارانی دیم ءَ برگ ءِ ھر وڈیں جھد کنگے کول کتگ –