شال: بیگواھیں مردمانی کھولانی ھئور ءِ سر ءَ زھرشانی نندانک برجاہ

زیارت ءِ وئیل ءَ پد گورنر کارگس ءِ دیم ءَ شال ریڈ زون ءَ برجاھیں بیگواھیں مردمانی کھولانی نندانک ءَ سِی ءُ یک روچ سرجم بوتگ انت، گوستگیں یک ماھے سرجم انت کہ بیگواھیں مردمانی کھول پچیں آزمان ءِ چیر ءَ نشتگ ءُ زھرشانی ءَ انت، مروچی سرجمیں روچ ءَ ھئور ءَ گورتگ کہ بیگواھیں مردمانی کھول بازیں اڈ ءُ جنجالانی دیمپان بوتگ انت –

کھولانی گوشگ انت کہ سرکاری نمائندگ مارا ھال ءُ اھوال کنگ ءَ نہ انت ءُ ناکہ مئے پیش کُتگیں لوٹ ءُ بیگواھیں مردمانی لڑ ءِ درگت ءَ گامگیج زورگ بوتگ، اے جیڑھانی درگت ءَ ما ھمے گندگائیں کہ سرکار سنجیدگ نہ اِنت –

زانگ بہ بیت گورنر کارگس ءِ دیم ءَ بیگواھیں مردمانی کھولانی زھرشانی ءَ ماھے ءَ گیش انت بلے تنی وھدی سرکار آھانی لوٹانی گوشدارگ ءَ منّگ رازی نہ انت –

کھولانی گوشگ انت کہ اگاں سوبائی سرکار ءُ برزی تبک ءِ واکداراں مارا ھمے وٍ دلگوش نہ دات ءُ مارا گوشدارگ ءُ منّگ نہ بوت گڈا مئے دیمتری گامگیج ترند بنت ما سرکار ءَ بازیں وھدے داتگ بازیں وھدے ءَ ما سبر ءُ اوپار ءِ دامن گپتگ ءُ ودار کُتگ –