وائس فار بلوچ مسنگ پرسنز ءِ شدکشیں ھرتال ءَ چار ھزار ءُ ھپ سد ءُ سِی ءُ پنچ روچ سرجم بیتگ، یکجھتی ءِ واستا نیشنل پاٹی ءِ اُستانی جنرل سیکرٹری عبدالصمد رند، اُستانی سوشل میڈیا سیکرٹری سعداللہ دھوار، فنانس سیکرٹری عبداللہ ءُ دگہ مردم ھوار بیتگ اَنت-
ھمے وھد ءَ وی بی ایم پی ءِ وائس چیئرمین ماما قدیر بلوچ ءَ گشتگ وھدیکہ دمگی مردمانی سر ءَ زوراکی کنگ بیت اِنت گڑا اشی ءِ زنگ جنگ نہ بیت اِنت گڑا آئی ءَ سرپدی بیت اِنت زلم کنوک ءِ گون ءَ ھچ انساپ نہ بیت اِنت ریاستی جوڑ کرتگیں آمیدگس ھچ بلوچاں انساپ نہ دے اَنت مروچی بلوچستان ءِ ریگستان بلوچ پسگانی ھوناں گوں ھمرنگ بیتگ زیرستیں راجانی گون ءَ روچ پہ روچ جاور مٹ بیان اَنت بلے آیانی بھت مٹ نہ بیت اِنت بلکیں وتی بھت وت مٹ کنگی اِنت بھت جد ءُ جھداں چہ جوڑ بیت اِنت-
آئی ءَ گوشتگ کہ اگست ءِ ماہ بلوچانی واستا یک سیاھیں روچے گوستگیں سالانی رنگ ءَ اے سال ءَ ھم اگست ءِ ماہ ءَ بازیں بلوچانی ھون چُنسیتگ اَنت ءُ بیگواہ کنگ بیتگ اَنت بیگواھیں مردمانی گار کنگ ءُ آیانی لاشاں جنگلاں دور دیگ ءِ درچ برجاہ اِنت میان اُستانی زوراک ءُ پرزوریں تاکت ور ھونریچی کنگ ءَ اِنت بلوچستان ءَ ھونین کنگ ءَ اِنت-
آئی ءَ گشتگ کہ ریاست وتی بنزہ ءُ بنچگ ءِ سرجم کنگ ءَ بلوچ نسل کشی ءُ زورانسری بیگواھیانی درچاں روچ پہ روچ گیش کنان اِنت آئی ءِ گمان اِنت ھما وھد ءَ اے راج نہ بیت اِنت گڑا ھما وھد ءَ اشانی زمین ءِ مڈیانی کشگ ءَ پہ آئی ءِ آسانی بیت اِنت بلوچستان ءِ بازیں جاھاں مروچی ھم پوج ءِ لشکر کشی برجاہ اَنت مردمانی لوگاں پروشگ ءُ ڈرینگ ءَ اِنت گوستگیں روچ ءَ شال ءَ ھوار بلوچستان ءِ دگہ جاھاں چار مردم زورانسری آوار جنی ءِ آماچ بیتگ اَنت-