نرم نرم ءَ شلوکیں ترمپاں ٹنگ اتگیں اکس مسگ ءَ اِنت ءُ آئی ءَ بے وسی ءَ چارگ ءَ اِنت بلے ھچ کُت کنگ ءَ نہ اِنت- آ ھچبر شات مہ بات اَنت آیاں مارا در پہ در کرتگ-
اے گپانی درشانی وائس فار بلوچ مسنگ پرسنز ءِ رھشون سمی دین بلوچ ءَ شال ءَ برجمیں نندانک ءَ کتگ اَنت کہ اود ءَ ھور گوارگ ءَ اِنت ءُ ھمے وڑ بیست ءُ ھشت روچاں بیگواھیں مردمانی کھولاں نندانک جتگ ءُ نشتگ اَنت-
سمی دین ءَ چاگردی ترامجاہ ءَ نبشتہ کرتگ کہ مروچی ءَ پیسر اے ریاست ءَ ھچ بر نپرت ءِ درنگازی نہ کتگ مروچی منی اندر ءِ درد من ءَ نیلگ ءَ اِنت، جسم ءُ جان زدگ اَنت چم پر ھرس اَنت ءُ بزگیں زبان ءَ وتی دردانی درانگازی ءَ گوش آں آ درست تباہ ءُ برباد بہ بنت ءُ آ ھچ بر ایمن مہ بات اَنت شاتمان مہ بات اَنت کہ آیاں مارا دگانی سر ءَ در پہ در کرتگ-
آئی ءَ گوشتگ کہ آیاں ما ھچبر وتی ترندیں نگاھاں چار ات نہ کن ایں بلے آئی ءِ اکس شلوکیں ھور ءَ مسگ ءَ اِنت بلے ما بے وسی ءَ آئی ءَ چارگ ءَ اِنت –