ھون ءُ ارس ءِ سْیادی
آزمانکار: ساجد بلوچ
دی بلوچستان پوسٹ
کمبر میران ءِ اولی ءُ گُڈی بچ اَت پرچاکہ آئی ءِ مات ءَ دگہ چُک نہ بوتگ اَت بزاں آ سنٹ اَت میران سکیں بزگریں مردے اَت ءُ آ مُدامی وتی پسانی چارینگ ءَ جنگل ءَ شُت پرچاکہ آ شْوانگے اَت آئی ءَ مُدام ھمے جُھد کُت کہ چیزے زر بہ کمائین آں تاکہ وتی یکیں بچ بزاں کمبر ءَ بِوانین آں گِندئے آ چونیں شرّیں پتے اَت، بازیں تکانسری ءَ پد آئی ءَ بھ وتی چُک ءَ را اے باور نہ کنائینت کہ تو بے وس ئے۔
یاسمین کمبر ءِ مات اَت۔ گْوش اَنت کہ مات ءِ مھر زمین ءِ مھر ءِ ڈول ءَ اِنت کمبر ءَ وتی مات سک دوست اَت، بلے کمبر ءِ مات ھم کمتر نہ اَت کمبر ءِ مات یاسمین کمبر ءِ واست ءَ گنوک اَت۔ کمبر ءِ مات سکیں گیرت مَنْدیں زالے اَت بلے آئی ءَ مُدامی دگرانی لوگاں کار کُت تاکہ کمبر جان ءَ یک شرّیں ھلمے ءِ واھند بہ کن آں بلے چے کن ایں وانگ ءُ زانگ گریب ءِ واست ءَ یک مزنیں جیڑھے۔
کمبر میزان میزان ءَ مزن بوھان اَت، آ ھر وھد ءَ کوہ ءُ جنگلاں شُت پرچاکہ آئی ءَ سک وش بوت۔ برے آئی ءَ گوں سِنگاں لیب کُت ءُ برے آئی ءَ وت ءَ پُلکانی تہ ءَ پُلپیٹ کُت، برے آئی ءَ گلزمیں ءِ سر ءَ وت سوت اڈ کُت ءُ پد ءَ آ ھمے سوت ءَ جَنگ ءَ اَت ءُ برے آ دْرچکانی پُلّاں
بو چِنگ ءَ اَت ءُ برے مُرگانی کوکوھاں اشکنگ ءَ اَت۔
وھد گوازگ ءَ اَت ءُ کمبرو مزن بوت بلے نگت آئی ءَ گلزمین ءِ مھر برجم داشتگ اَت کمبرو پہ وتی گلزمین ءَ شیدا اَت کمبرو ءَ ھر وھد ءَ مار اِت کہ من چے بہ کن آں کہ منی راج ءَ را پائدگ بہ رس ایت۔ آئی ءَ وانگ ءِ باز ھُب ءُ واھگ ھست اَت پرچاکہ آئی ءَ زانتگ اَت کہ بے وانگ ءُ زانگ ءَ ھچ چیز نہ بیت۔
یاسمین ءُ میران ءَ ھر چیز کُت وتی چُک وانینت پہ باز وانگ ءَ آیاں وتی تاسُکیں بچ شال ءَ دیم دات۔ کمبر ءَ شال ءَ وتی بزّگیں راج ءِ درد مار اِت پرچاکہ آ سرپد اَت وانگ ماں اے چاگرد ءَ مئے واست ءَ نہ اِنت کمبر اے ھم سرپد بوت کہ مئے زبان چہ مارا پچگرگ بوتگ بلے مارا مئے زبان ءِ وانگ شانزدہ تبک ءَ گِندگ ءَ کیت بلے اے نوں ھما گپ اِنت کہ لوگ ءِ چت ءَ پیسر ءَ بند ءُ رند ءَ بن پد ءَ بند گڑا اے ڈولیں وانگ مارا چو کلمپوگ ءِ ڈول ءَ دْرو ایت، کمبرو مارگ ءَ اَت۔ گڑا آئی ءَ راجکاری بندات کُت بلے آئی ءِ پت ءُ مات گل اِت اَنت کہ مئے چُک ڈاکٹرے بیت بلے کمبر پُشت ءَ کینزوکیں مردے نہ اَت، ءُ دائمی ءَ ساڑی ءُ جاڑی اَت۔ برے بچار آ گوں سنگتاں کار ءَ اَت، برے آ پروٹسٹ کنگ ءَ اَت، برے بچار آ تْران کنگ ءَ اَت کہ چینی گوں وتی کسانیں چمّاں ءُ وتی پٹکّیں بالاداں وتی راج ءِ ھاتر ءَ کار کن اَنت گڑا ما پرچا کار مہ کن ایں، ءُ برے آئی ءَ گْوشت کہ دگنیا ءِ تہ ءَ جاپانیز ھر وھد ءَ دگنیا ءِ دیم ءَ وت ءَ شرتر لیک اَنت گڑا ما پرچا وتی راج ءِ سر ءَ پکر مہ کن ایں۔
کمبرو اوشتگ ءِ وڑ ءَ نہ اَت پرچاکہ آئی ءَ وتی راج ءِ درد مار اِتگ اَت۔ وھد گوازان اَت کمبرو تینز بوھان اَت مردم سرپد بوھان اِت اَنت بلے واجہ وش نہ بوھان اِت اَنت آ روچ یک سْیائیں روچے اَت وھدے کہ زلماں کمبرو چیست کُت۔ کمبرو گار بوت۔
مردم دگانی سر ءَ زھرشانی ءَ اِت اَنت بلے کمبرو آھگ ءِ نام ءَ نہ زانگ ءَ اَت بلے گپے زان ئے آئی ءَ زانتگ اَت کہ یک روچے منی ھون زمین ءِ دلبند ءَ شل اَنت۔
پد ءَ ھمے وڑ ھم بوت زلماں آ کُشت ءُ آئی ءِ جون زمین ءِ دلبند ءَ چگل دات۔ آئی ءِ ھون سُھر اِت اَنت گْوش ئے پورا چہ آئی ءِ ھوناں گل ءِ دست ءُ پاد انّی کُتگ اِت اَنت بلے آئی ءِ مرگ ءِ ھال ءَ یاسمین ءِ چمّانی ارس ءِ ھار جوڑ کُتگ اَت بلے یاسمین ءِ ارس بے رنگ اِت اَنت میران ءَ وتی دست زمین ءِ دلبند ءَ جت اَنت پریاد کنان ءَ دیم پہ جنگ ءَ شُت بلے آئی ءِ مات ءِ گنوکی ءَ وتی مھر پدّر کُت کہ منی مھر چہ گل ءِ مھر ءَ کمتر نہ اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔