ھرنائی: پوج ءِ بگیری ءَ مردمانی زھرشانی

ھرنائی ءَ دمگی مردماں وئیل ءِ بگیری ءَ جون ایر کُتگ ءُ زھرشانی کُتگ –

ھرنائی ءِ دمگ کھوسٹ ءَ گوستگیں روچ ءَ پاکستانی پوج ءِ تیرگواری ءَ بیران بوتگیں بوتگیں سیاسی باسک خالق داد بابر ءُ دگہ زھرشانی کنوکیں مردمانی زدگ کنگ ءِ بگیری ءَ آل پارٹیز نیمگ ءَ ھرنائی ءَ زھرشانی ءُ روانک کشگ بوتگ –

وئیل بگیری ءَ زھرشانی ءَ مزنیں کچ ءَ مردماں بھر زرتگ ءُ زھرشانی کنوکیں مردمانی دست ءَ سیاھیں بیرک بوتگ انت ءُ آھاں ھرنائی وئیل ءِ بگیری ءَ نارہ جتگ – زھرشانی کنوکاں لوٹ کتگ کہ وئیل ءَ بیران بوتگیں خالق داد ءُ زدگ بوتگیں مردماں انساپ دیگ بہ بیت –

ھرنائی کھوسٹ ءَ زھرشانی کنوکانی سر ءل تیرگواری کنگ ءُ سیاسی باسک ءِ کوش ءِ بگیری ءَ آھاں بیران بوتگیں مردم ءِ جون ہرنائی تاں شال ءَ رؤک شھدگ ءِ سر ءَ ایرکتگ ءُ زھرشانی کنان ءَ دگ بند کتگ –

وئیل ءِ بگیری ءَ زھرشانی عوامی نیشنل پاٹی ءِ جار ءِ پد ءَ آل پارٹیز ءِ نیمگ ءَ کنگ بوتگ کہ آئی ءِ سروکی عوامی نیشنل پاٹی ءِ دمگی سنئیر کمک سرکماش ملک ظریف ترین ءَ کُتگ وھدیکہ زھرشانی شانی ءَ پشتونخواہ میپ ءِ ماسٹر شینگل، عوامی نیشنل پارٹی ءِ سید یوسف شاہ، پی ٹی آئی ءِ دمگی سرکماش صدام ترین، جمعیت علمائے اسلام دمگی سرکماش مولوی عبدالخالق مری، این ڈی ایم ءِ احمد جان، پی ٹی ایم ءِ وہاب خان کاکڑ، مولوی زاہد، چہ زیارت مزمل خان، عوامی نیشنل پارٹی ءِ سوبائی جنرل سیکرٹری مابت کاکا ءُ دیگہ مردم ھم ھوار بوتگ انت –

ہرنائی وئیل ءِ بگیری ءَ نندانک ءَ نشتگیں آل پارٹیز ءَ جار جتگ کہ ما تاں ھما وھد ءَ نندانک ءَ نندیں وھدیکہ مئے لوٹ منّگ نہ بنت –

زانگ بہ چاردہ اگست ءِ شپ ءَ بلوچ سرمچاراں ھمے دمگ ءَ پاکستان ءب پوج ءِ کاروان ءُ بنجل ءِ سر ءَ اپرش کتگ ات – دمگی مردمانی گوشگ انت کہ اُرش ءَ پد پوج ءَ لس مھلوک ءِ سر ءَ تیرگواری کتگ کہ چریشی ءَ دو مردم زدگ بوتگ انت ءُ گڈا دومی سھب ءَ زھرشانی کنوکانی سر ءَ ھم پوج ءَ تیرگواری کتگ کہ چریشی ءَ پنچ مردم زدگ بوتگ انت ءُ یک ءِ بیران بوتگ –

پوج ءِ بنجل ءِ سر ءَ بوتگیں اُرش ءِ زمہ واری بلوچ لبریشن آرمی ءَ منّ اِتگ ات –