عارف بلوچ بلوچی ازم ءِ سوداگر – دردانگ بلوچ

نبشتانک: عارف بلوچ بلوچی ازم ءِ سوداگر

نبشتہ کار: دردانگ بلوچ

دی بلوچستان پوسٹ

من اَجب جیڑاں تاں هیال کن آں مئے ازمکار پرچا راجدپتر ءِ تُرس دل ءَ نہ داراں کہ اگاں مرچی ما چُش کُت باندا مارا راجدپتر نہ بکش ایت مروچی ءَ بِگر داں سداں سال چنچو مردم مُرتگ ءُ شُتگ اَنت مرچی پرچا تنھا لھتیں نام مئے دپ ءَ اِنت مروچی ما پرچی آغا عبدالکریم ءَ زاناں مروچی پرچی ما مھراب خان ءَ زاناں بانڈی ءَ زاناں پرچا کہ آیاں راجی جُھد کُتگ ءُ وتا دائمی نمیران ءُ ابدمان کُتگ-

ما انگت چِد ءُ دور مہ رو اِنت انی همے زُوتاں کہ نور خان بزنجو ءِ سالروچ چو دیوانی دروشم ءَ نہ بوت بلے کُل بلوچانی دپ ءَ اَت اَکس ماں رسانکدر ءَ ایر کنگ ءُ یات کنگ بوت پرچا کہ آئی ءَ ازم ءِ سودا نہ کُتگ آئی ءَ مدامی گُشتگ راجی زبان ءَ بُہ وان اِت گوش بدار اِت ءُ نوشتہ بکن اِت آه یک راجی ازمکارے بوتگ-

دگہ ناسرپدیں سنگت همے گپ ءَ گُش انت کہ عارف بلوچ ءِ گُشتگیں پیسریگیں سوتاں بے هال اِت زاناں شُما؟ سنگت ادا راجی جُنزے جُنزگ ءَ اِنت اد ءَ خلیل ساچان ءِ ڈولیں راجی کماندار یک رِدی ءِ کنگ ءَ آئی ءَ راجی آمیدگش نہ بکش ایت عارف بستار چی اِنت؟ عارف جتگیں سوت خلیل ساچان ‎ءِ داتّگیں کربانی آں گیش ارزشت دار اَنت؟ ادا هما سُپاهیگ کہ آیاں ده سال جُنز ءَ داتگ ءُ جُنگ کُتگ رندا لگور بوتگ اَنت تو چی گُش ئے ایشانی پیسریگیں کُتگیں راجی کربانیانی چارگ ءَ پد بکشگ بہ بنت؟ عارف ءَ وَ انگت چار سوت جتگ ءُ لاپ وارتگ-

دگہ لھتیں سنگت گُش ایت عارف پہ مجبوری آئی ءِ سر ءَ زور دیگ بیت اگاں مہ روت جَن اَنت ئِے عارف تنھا سرکاری پروگرام ءُ دیواناں بھر نہ زور ایت بلکیں وت روت سرکاری چریگانی کیرا پہ دو بوتل شراب ءَ همک شپ یک دلارے ءِ بیٹهک ءَ ازم ءِ سودا ءَ کنت اے گواھی ءَ آئی ءِ فیسبوک تاک ءُ انسٹاگرام تاک دے اَنت ایشی ءَ ابید دگہ بازیں پروگرام حب چوکی ءَ علی حیدر محمد حسنی ءِ چُکانی سور ءَ دیوان ءُ اَکس پہ پھر ءُ شانے رسانکدر ءَ داتگ اَنت-

عارف بلوچی ازم ءِ سوداگرے مروچی ءَ پَد ناں من عارف ‎ءَ گوشداراں نیکہ من عارف ءِ نامے پُشت ءَ بلوچ لیکاں ءُ بلوچ راج هم ایشی ءِ سوشل بائیکاٹ بکنت دانکہ اے بہ پھم ایت بیدے بلوچ ءُ بلوچے سرزمین ءَ من بُوچے نہ آں –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔