سندھ: پوج ءَ بازیں راج دوستیں باسک آوار جتگ ءُ بیگواہ کتگ اَنت

پاکستانی پوج ءَ سندھ ءِ جتا جتائیں دمگاں بازیں مردمے زورانسری آوار جتگ ءُ بیگواہ کتگ انت –

وائس فار مسنگ پرسنز آف سندھ ءِ جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ چاردہ اگست ءَ ریاستی ادارہ رینجرز، پولیس ءُ پوجی ایجنسیاں سرجمیں سند ءِ تہ ءَ سندی راجدوستیں باسکانی بگیری ءَ کریک ڈاون کُتگ ءُ بازیں راج دوستیں باسک ءِ زورانسری آوار جتگ ءُ بیگواہ کتگ انت –

وائس فار مسنگ پرسنز آف سندھ ءِ رِد ءَ گوستگیں روچ ءَ پوج ءَ کراچی ءِ دمگ کورنگی ءَ گِسانی سر ءَ بیڑ برتگ ءُ کلانیں راجدوست ءُ سند سجاگی گل ءِ رھشون لطیف میمن، جئے سندھ محاز ءِ رھشون شوکت سومرو، اختیار چانڈیو ءُ جسقم ءِ باسک ایاز دیشی آوار جتگ ءُ بیگواہ کتگ انت-

ھمے وڑ پھازگی لشکر ءَ چہ سندھ رانیپور ءَ سندھ سبھا پاٹی ءِ رھشون ڈاکٹر نظیر کھوکر ءُ شوکت گھانگھرو، چہ کوٹری ءَ سندھ یونائیٹڈ پاٹی ءِ رھشون طارق سومرو، ابراہیم چنا ءُ جسقم ءِ باسک صدام جمالی آوار جتگ ءُ بیگواہ کتگ انت –

آئی ءَ گوشتگ کہ پھازگی لشکر ءَ چہ نوابشاہ ءَ جئے سندھ محاز ءِ باسک فرحان کھوسو، چہ نوشھرو فیروز ءَ جسقم ءِ باسک اصغر بھنگوار، چہ چہ کوٹری کیبر ءَ لالا فھیم سومرو ءَ ھوار دگہ باسکانی گِس ءَ بیڑ برتگ ءُ زوراکی کنان ءَ آ آوار جتگ ءَ بیگواہ کتگ انت –

سندھی رھشونانی گوشگ انت کہ ھمک سال چاردہ اگست ءَ پیش ریاستی زلم زوراکی بندات کنگ بنت ءُ راجدوستیں باسک درکانودی آوار جنگ ءُ بیگواہ کنگ بنت –

وائس فار مسنگ پرسنز آف سندھ ءِ رھشونانی گوشگ انت کہ پاکستانی ریاست ءَ سندھ ءِ تہ ءَ زوراکی ءِ سرجمیں سیمسر سرگوز کرتگ انت – زورانسری آوار جنیانی میان استمانی روچ ءِ درگت ءَ سِی اگست ءَ کراچی ءَ زھرشانی کنگ بیت اِنت –

وائس فار مسنگ پرسنز آف سندھ ءَ میان استمانی انسانی ادارھاں گوں دزبندی کتگ کہ آ سندھ ءُ بلوچستان ءَ پاکستان ءِ زوراکیانی بگیری ءَ گامگیج بہ زور ایت پاکستان ءِ سر ءَ سفارتی زور بہ دنت ءُ بیگواھیں مردمانی یل کنائینگ ءَ وتی کرد ءَ پیلو بہ کنت –