پنجگور: ڈپٹی کمشنر ءِ گِس ءِ سر ءَ بمب اُرش، لیویز ءِ کارمندے زدگ

سربوتگیں ھالانی رِد ءَ ناشناسیں مردماں پنجگور ءَ ڈپٹی کمشنر ءِ گِس ءَ دزبمبے جتگ –

ھالانی رِد ءَ ناشناسیں پرپٹ سواراں پنجگور ءِ ڈپٹی کمشنر عبدالرزاق ساسولی ءِ گِس ءِ سر ءَ دزبمبے چگل داتگ ءُ در شُتگ انت – دزبمب ءِ اُرش ءَ ڈپٹی کمشنر ءِ گاٹ لیویز کارمند صغیر احمد زدگ بوتگ –

وئیل ءَ پد پولیس ءِ ٹولی وئیل جاہ ءَ سربوتگ انت، زدگ بوتگیں لیویز کارمند ڈی ایچ کیو نادراھجاہ ءَ سر کتگ –

واکدارانی رِد ءَ تراک ءِ وھد ءَ ڈپٹی کمشنر عبدالرزاق وتی گِس ءَ ساڑی بوتگ بلے آ چہ اے اُرش ءَ رکّ اِتگ – پولیس اُرشکاراں شوھاز انت –

زانگ بہ بیت مرچیگیں روچ ءَ بلوچستان ءِ دمگ کلات ءَ پاکستانی پوج ءِ گاڑی ءِ سر ءَ ھم اُرش کنگ بوگ ءُ ھمے وڈ بلوچستان ءِ دمگ ہرنائی ءَ ھم سلاہ بندیں مردماں پاکستانی پوج ءِ بنجل ءِ سر ءَ اُرش کُتگ –

ھمے گوشگ بوگ ءَ انت کہ پوج ءِ سر ءَ بوتگیں اُرشاں پوج ءَ جانی ءُ مالی تاوان ءِ دیمپانی بوتگ – بلے تنی وھدی اے اُرشانی زمہ واری ھچ گلانی نیمگ ءَ منّگ نہ بوتگ انت –