بلوچستان ءِ کیچ دمگ ءَ یک جنین یے ءَ ناشناسیں جیڑھانی سوب ءَ وتکُشی کُتگ ءُ وتی زند آسر کُتگ۔
وتکُشی ءِ وئیل کیچ دمگ بنجاھی شھر تُربت ءَ آبسر ءِ ھند ءَ دیما اَتکگ، پولیس ءِ ردءَ آدینگ ءِ روچ ءَ آبسر کولوائی بازار ءَ مسماۃ (ن) جِنِک محمد انور ءَ نزانتگیں جیڑھانی سوب ءَ وتکُشی کُتگ۔
لعش ٹیچنگ اسپتال ءَ برگ بیتگ ءُ المی پَٹ پول کنگ ءَ لعش کھول ءِ دست ءَ دیگ بیتگ۔
زانگ بہ بیت بلوچستان ءَ وتکُشی ءِ وئیل یک ترسناکیں جاورھالی ءَ رستگ اَنت، ھمے ھپتگے تہءَ کیچ دمگ ءَ دیما اتکگیں اے دومی وئیل اِنت چریشی ءَ پیسر تُربت دشتی بازار ءَ ایاز نامی ورناھے ءَ وتکُشی کُتگ اَت۔
بلوچستان ءَ یک کساسی ءِ ردءَ وتکُشیانی بازیں وئیل دیما پیداک اَنت کہ چہ اشاں یک کسانوکیں بھرءِ رسانکدراں سر بیت۔
دی بلوچستان پوسٹ ءِ جم کُتگیں شمارانی ردءَ ھمے سالءَ داں انگت بلوچستان ءِ تہءَ سئے ءَ چہ گیش کیس رپورٹ بیتگ اَنت، ءُ اے ھما کیس اَنت کہ اشانی درگت سدکی کھول ءُ ھندی اھوالاں کُتگ اَنت۔