نبشتانک: گُڈّی بِچکند
نبشتہ کار : جلال اھمد
دی بلوچستان پوسٹ
بیگاھے ساھت ادار شش ات وھدے کہ آ انگریزی وانگجاہ (انگلش لینگویج سنٹر) ءَ چے واتر وتی گِس ءَ روگ ءَ اَت گُڑا من آئی ءِ گِسے دیم ءِ دیوال ءِ بُن ءَ نِشتگ اَت آں ءُ آئی ءَ من ءَ نیم چمّی چار اِت بلے آئی ءَ ھچ نہ گْوشت کہ آئی ءَ را وتی مستریں گْوھار گُون اَت گوں، دومی روچ ءَ آ وانگجاہ ءَ اَتک گُڑا من ءَ گْوشت ئِے وت ءَ گَنوک مہ کن بلے من آئی ءَ را پَسّو نہ دات ءُ وتی دیم آ دیم ءَ کت، ھمے پئیم ءَ دومی روچ بُوت من نشتگ اَت آں ءُ گُڑا سُھب ءَ مھلا اَتک منی گْور ءَ کہ تو منی سرا انچو شَیدائے کہ مُدام منی گِس ءِ دیم ءَ نِندے من کمو بیوار بُوت آں بلے آئی ءَ را پَسّو نہ دات پد ءَ آئی ءَ درّائینت کہ تو چی ءَ منی پَسّواں نہ دئے زاناں گُنگ ئے ئِے؟گُڑا من آئی ءَ را گْوشت کہ زندمانے تَہ ءَ لھتیں انچیں بنی آدم ھست کہ آیانی دیم ءَ مردم گپ کُت نہ کنت ءُ انسانے دل لوٹ اِیت ھر دویں چم بس آیانی دیدار ءَ بِہ کن اَنت ءُ اے وڑیں انسان آں چے یکّے تو ئے، آئی ءَ پہ مسکرا پسّہ دات کہ تو سک زبَرے۔
سیمی روچ آدینگ ءِ روچ اَت کہ آ وانگجاہ ءَ نہ یتک من سک تکانسر بُوت آں اِیندگی روچ ءَ آ وانگجاہ ءَ کہ اَتک من آئی ءَ را جُست کت کہ تو زی چی ءَ نہ یتکگ ئے؟یک برے آئی ءَ پہ مسکرائی منی پسّہ دات ترا چی ءَ بُہ گْوش آں نہ گْوش آں ترا ءُ پد ءَ آئی ءَ من ءَ گْوشت کہ ما وتی اے گِس یل کُتگ اَنت ءُ دِگہ میتگے ءَ شُتگ اِنت ھمے دمان ءَ من ھجکہ بُوت آں، گُڑا آئی ءَ منی گْور ءَ سرجمیں گپ کت اَنت ھمے ساھت منی زندگی یے وشتریں ساھت اَت اَنت بلے انسان آ وھد ءَ کہ وَشّی ءِ تَہ ءَ بیت گُڑا گم ءُ رنجاں چے شمشکار ءَ بیت۔
دِیر نہ گْوست لھتیں روچ ءَ پد من ءَ اَنچو گُمان بُوگ ءَ اَت کہ آ گوں من گپ ءِ چیر دَیگ ءَ اِنت، بلے من آئی ءَ را دائم جُست کتگ اَت کہ تئی دل ءَ گپے ھست من ءَ بُہ گْوش ئے آئی ءَ من ءَ باز گْوشت کہ گپ نیست گُڑا ھپتگے ءَ رند آئی ءَ من ءَ گْوشت کہ من ترا گپے گْوش آں بلے وت ءَ پریشان مہ کن۔
ھمے گپ ءَ گوں من جیڑگ بِندات کت ءُ بے کساس ھیران بُوت آں باریں چے گپّے ؟ گْوش ئے من ءَ ھِیدیے ءَ سر کُت ءُ منی سرجمیں بالاد ءَ لرزگے بِنا کت من انچو مارگ ءَ اَت آں کہ من ءَ سْیاہ تپے ءَ گِپتگ ھمے وھد ءَ کہ آئی ءَ منی جاور دِیست گُڑا آ ھم دِگہ وڑ بُوت، گُڑا من آئی ءَ را گْوشت کہ وتی گپ ءَ بہ کن چے گپّے ؟آئی ءَ بچکند اِت ءُ گْوشت کہ من نوں واتر وتی میتگ ءَ روگ ءَ آں، بلے زندگ بُوت آں واتر کن آں پہ تو ھمے بچکنداں آئی ءِ گُڈّی بچکند اَت نوں آئی ءَ چار سال سرجم بُوتگ کہ واتر نہ یتکگ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔