ڈیھے دیمھونیاں نمیرانیں سراں دروت، آھاں رژن ء آجوئی ءِ ستاھی نام ءَ دے آں – بی این اے

چہ ھمراھانی نمیرانی ءَ مئے جزبگ نِزور بوت نہ کن اَنت ءُ پہ آجوئی ءِ وڑیں پاکیں منزلے ءَ شھیدانی رتکگیں ھون پہ ما روکیں کندیل بنت – مرید بلوچ

بلوچ آجوئی لوٹوکیں سلاہ بندیں گل بلوچ نیشنلسٹ آرمی ءِ جارکش مرید بلوچ ءَ رسانکدراں وتی شمگ کرتگیں درشان ءِ تہ ءَ گوشتگ کہ بیست ءُ نُھ جولائی دوھزار بیست ءُ دو ءَ آدینگ ءِ سھب ءَ وھدے مئے سرمچار مدامی ئیں وڑ ءَ سپر ءَ بوتگ اَنت گڑا پنجگور ءِ دمگ دِز پْروم ءِ ھندءَ آھانی دیم پہ دیمی گوں زورگیریں پوج ءُ آھانی بھازرتگیں ھَندی کشندہ ٹولی ءَ بوتگ ءُ ھمے میان ءَ یک ھونی ئیں میڑے بندات بوتگ –

آئی ءَ گوشتگ کہ مئے سرمچاراں گوں جْوانیں جنگی رِپکاں دژمنیں پوج ترندیں ڈَکّ جتگ گڑا دژمن ءَ پہ وتی کمک ءَ جنگی بالگرد لوٹائینتگ انت ءُ بالگرداں گوں ھمے ھندءِ رَسَگ ءَ بے کساس تیر ءُ گولہ آس داتگ چریشی ھمراھیں گل بی ایل اے ءِ ھمراھیں سرمچار عتیق بلوچ پنام کازی شھید بوتگ ءُ وھدیکہ سنگت کماندار بابر یوسپ گوں آ دگہ ھمراھاں دژمن ءِ دیم داشتگ – ھمے نیام ءَ بالگرداں چہ پُشت ءَ کمانڈو ایر گیپتگ ءُ سرمچار چہ پشت ءَ انگیر کتگ اَنت بازیں اداراں اے دراجکش ءُ ھونی ئیں میڑ ءَ پوج ءِ بازیں ایس ایس جی کمانڈو جنگ بوتگ انت ءُ آ دگہ سرمچارانی پہ سلامتی چہ دژمن ءِ انگیر ءَ در کنگ ءَ پد سنگت کماندار بابر یوسپ پنام عاجز گلزمین ءِ دیمپانی ءَ گوں وتی آ گہ سنگتانی ھمراھی ءَ شھید بوتگ –

جارکش ءَ دیمتر ءَ گوشتگ کہ سنگت کماندار بابر یوسپ پنام عاجز ء محمد یوسپ جھمنند گرمکان پنجگور چہ سال دوھزار یانزدہ ءَ بلوچ راجی سلاہ بندیں جھد ءَ گوں گل ءِ پتر ءَ ھمگرنچ بوتگ- آ یک آزمودہ کاریں چیرجنگی سرمچار ءُ سَکیں لاھک ءُ جپاکشّی ءَ ھوار چیرجنگی رِپکاں سکّیں ھُژار ءُ زانتکاریں ھمراھے بوتگ – گل ءِ مھکم کنگ ءُ تالان کنگ ءَ ابید بلوچ راجی آجوئی سنگر ( براس) ءِ تالانی ءَ اوں ھر وھدءَ پیسر بوتگ – آئی ماں جنگ ءِ پِڑ ءَ پنجگور گچک آواران کیلکور گورکوپ اورماڑہ بُلیدہ زامران ءُ دگہ بازیں جاھاں زورگیریں پوج ءُ وتگڑیں سی پیک ءِ بگیری ءَ جْوانیں کاراں بھر زرتگ – آ اے وھد ءَ چہ گَل ءِ پتّ رءَ ماں پنجگور بالگتر کولواہ ءُ ھوشاپ ءِ دمگ کمانداری ءِ بستار ءَ وتی کرد ءَ جْوانیں رنگے ءَ پیلو کنگءَ بوتگ-

آئی ءَ گوشتگ کہ شھید سنگت عنایت پنام اکرام کاکو ء ملک داد جھمنند گیڈو سنگ گچک پنجگور سال دوھزار پانزدہ ءَ بلوچ راجی سلاہ بندیں جھدءَ ھمگرنچ بوتگ – آ یک سکیں اوپاری ءُ جنگی سرمچارے بوتگ ءُ گل ءِ ھمک کار ءَ کلاں پیسر بوتگ- آئی ءَ چہ گل ءِ پَتّر ءَ ماں پَنجْگُور گچک آواران ءُ کیلکور ءِ جنگی پِڑ ءَ وتگڑیں سی پیک ءِ بگیری ءَ جْوانیں کاراں بھر زرتگ ات ءُ آ اے وھداں گل ءِ پنجگور اوتاک ءَ دومی اوتاک کمانداری ءِ بستار ءَ وتی کرد ءَ پیلو کنگءَ بوتگ-

شھید سنگت عتیق بلوچ پنام کازی ء شھید رفیق سمالانی جھمنند شاھول نال ھزدار چہ گوستگیں یک سالے ءَ گوں ھمراھیں گل بلوچ لبریشن آرمی (بی ایل اے) ءَ بندوک بوتگ ءُ یک جپاکشّ ءُ ناترسیں سرمچارے بوتگ- یات بہ بیت کہ شھید سنگت عتیق بلوچ ءِ اریپیں پِت شھید رفیق سمالانی بلوچ راجی زرمبشت بی این ایم ءِ نال ھنکین ءِ باسکے بوتگ کہ سال دوھزار سینزدہ ھندی کشندہ ٹولی ءِ تیرگواری ءَ چہ شھید بوتگ اَت-

جارکش ءَ گوشتگ کہ شھید سنگت بلوچ ھان پنام رودین ء دلمراد جھمنند کلگ جکی گورکوپ کیچ سال دوھزار پانزدہ ءَ گوں بلوچ سلاہ بندیں گھگیری جھد ءَ ھمگرنچ بوتگ۔ آ یک جْوان ءُ جاڈی ئیں سرمچارے بوتگ آئی ءَ گورکوپ کولواہ کیلکور شادیکور پسنی اورماڑہ ءُ دگہ بازیں جاھاں دژمن ءَ را ترندیں ڈکّانی جنگ ءُ جْوانیں کاراں بھر زرتگ- آ اے وھداں ماں گل ءِ پتّر ءَ دومی بنجل کمانداری ءِ بستارءَ کار ءَ بوتگ-

شھید سنگت جھانزیب پنام فیصل ء بشیر احمد جھمنند گریب آباد چتکان پنجگور گوستگیں بازیں وھدی ءَ بلوچ راجی سلاہ بندیں جھد ءَ ھمگرنچ بوتگ – ایشی ءَ پیسر شھید جھانزیب ءِ دو بْرات شھید اسلم ءُ شھید اکرم ءُ ناکو شھید ناسر ڈگارزئی سرڈگار ءِ دیمپانی ءَ شھید بوتگ اَنت – شھید جھانزیب یک ناترس ءُ کاری ئیں سرمچارے بوتگ-

آئی ءَ گوشتگ کہ شھید سنگت دادشاہ پنام بالاچ ء قادر بخش جھمنند بلوچی بازار آپسر کیچ سال دوھزار چاردہ ءَ گوں بلوچ راجی سلاہ بندیں گھگیری جھد ءَ ھمگرنچ بوتگ – آئی ءَ تربت شھر ءُ کش ءُ گْوراں پسنی،گورکوپ شادیکور کولواہ ءُ کیلکور ءَ جْوانیں کاراں بھر زرتگ، آ یک ھُژار ءُ دور چاریں ھمراھے بوتگ –

بلوچ نیشنلسٹ آرمی جارکش مرید بلوچ ءَ گوشتگ کہ پہ سرڈگار ءِ دیمپانی ءَ شھید بوتگیں گَل ءِ دمگی کماندار شھید بابر یوسپ ءُ آئی ءِ جوانیں ھمراھاں شھیدیں سرمچاراں مئے گل ستک شانی ءُ سھریں دروت ندر کنت ءُ اے کول ءَ کنت کہ زورگیر ءِ بگیری ءَ داں گُڈی سرمچار ءَ مئے سلاہ بندیں ارش برجاہ مان ایت-