پاکستان ءِ یک ناشرکاریانی داروکیں آمید گِس ءَ کراچی ءَ کنفیوشس انسٹی ٹیوٹ ءِ سرءَ بیتگیں اُرش ءِ یک گمانی آسراتی دیوکے مردمے چاردہ روچانی ھاترءَ آمید گِسی ریمانڈ ءِ ھاترءَ جیل ءَ دیم دیگ بیتگ۔
شمبے ءِ روچ ءَ ناشرکاریانی داروکیں آمید گِس ءَ کراچی کنفیوشس انسٹی ٹیوٹ اُرش ءِ درگت کیس گوش داشتگ۔
پولیس ءَ گمانی کمک کار داد بخش آمید گِس ءَ آورتگ۔
پولیس ءَ گُشتگ کہ دزگیریں مردم ءَ چہ انگت پَٹ ءُ پول سرجم نہ بیت، دزگیرں مردم بی ایل اے ءُ بی ایل ایف ءِ کراچی ءِ کماندار اِنت۔
پولیس ءِ گُشگ اَت دزگیر بیتگیں مردم کراچی یونیورسٹی ءَ چینی استادانی سرءَ وت کُشیں تراکانی ماسٹر مائنڈ اِنت ءُ کراچی اُرشانی کمک کاری ءِ کار کنگ ءَ بیتگ۔
آمید گِس ءَ دزگیریں مردم چاردہ روچی آمید گِس ءِ ریمانڈ ءِ سرءَ جیل ءَ دیم داتگ پَٹ ءُ پولی اپسراں داں دیمے گوش دارگی روچ ءَ کیس ءِ چالان ءِ ھوار کنگ ءِ پرمان داتگ۔
زانگ بہ بیت کہ دزگیریں مردمے کھول ءِ ردءَ شعیب بلوچ چہ نال خضدار ءَ سیادی داروکیں یک نودربر اِنت کہ آ 29 اپریل 2022 ءَ کراچی ءِ گلستان جوھر، بشیر ولیج ءَ چہ بیگواہ کنگ بیتگ بلے چار جولائی دوھزار بیست دو ءَ سی ٹی ڈی ءَ ماری پور کراچی ءَ چہ آئی دزگیری داد بخش بلوچ ءِ نام دیما آورتگ ءُ آئی سرءَ وتگڑیں بھتام جتگ ءُ دو ماھانی ھاترءَ ریمانڈ ءِ لوٹ کُتگ بیتگ۔
شعیب بلوچ ءِ کھول ءَ تُربت ءَ یک پریس کانفرنس ءِ تہءَ گُشگ اَت آ کراچی مزن شھدربرجاہ ءَ داخلہ زیرگ ءِ جھد ءَ بیتگ۔ آ یک مھنتی ءُ وانوکیں نودربر اِنت آئی دزگیری ءَ چہ آئی وانگی کیریر تاوان بار بیگ تُرس اِنت، دو ماہ ءِ ریمانڈ ءُ لٹ ءُ کُٹ ءَ پد الم آئی ذھنی جاور نگیگ بنت۔