گوستگیں سئے روچاں چہ بیگواھیں مردمانی کھولانی گورنر ھاؤس ءِ دیما زھرشانی ننداک برجاہ اِنت، ھما وھدءَ دومی نیمگ ءَ لشکریانی دستءَ زورانسری بیگواھیانی یکشلی ھم برجاہ اِنت، گوستگیں لھتیں روچانی نیام ءَ لشکریاں بلوچستان ءِ جتاھیں دمگاں چہ نیم درژن ءَ گیش مردم دزگیر کنگ ءَ پد بیگواہ کُتگ اَنت۔
نوکتریں ھالانی ردءَ پاکستانی لشکریاں ڈیرہ مراد جمالی ءَ چہ دگہ دو مردم دزگیر کنگ ءَ بیگواہ کُتگ اَنت، بیگواہ بیتگیں مردمانی پجار اکبر ء نواب خان ءُ جیسف ء نواب خان ءِ ناماں چہ بیتگ۔
یات بہ بیت کہ گوستگیں لھتیں روچاں چہ زورانسری بیگواھی ءِ وئیلانی تہءَ تیزی گندگ ءَ پیداک اِنت، گوستگیں روچاں خاران پرپیٹ ءِ جھمنند خلیل اھمد چہ کلان ءَ وتی دکان ءِ دیما چہ سی ٹی ڈی ءُ چیریں گلانی کارمنداں آوار جتگ ءُ بیگواہ کُتگ۔ چہ اِشی ءَ پیسر مھمد اسلم ء حاجی ابراھیم مینگل 18 جولائی ءُ غلام جیلانی ء مھمد امین 19 جولائی ءَ سی ٹی ڈی ءُ چیریں گلاں بیگواہ کُتگ اِت اَنت۔
گوستگیں روچاں بلوچستان ءِ دمگ کیچ ءِ ھنکین تمپ ءَ پاکستانی لشکریاں دو ورناہ سدیر ء رحیم بخش ءُ نوید ء حمید دزگیر کُتگ ءُ گوں وت بُرتگ اَنت۔ وھدیکہ گوستگیں روچاں بجار خان مری جھمنند کلی کمالو نامی مردمے لشکریاں چہ شال مری آباد ءَ دزگیر کنگ ءَ پد بیگواہ کُتگ۔
چہ مستونگ ءَ گوستگیں روچاں لشکریاں عطااللہ شاہوانی ءُ عبیداللہ شاہوانی ءُ آھانی سیاد مجیب الرحمن شاہوانی ءُ عبدالخالق شاہوانی لوگ ءَ بیڑ برگ ءَ پد دزگیر کُتگ اَنت بلے آ پدءَ یل دیگ بیتگ اَنت۔
زانگ بہ بیت گوستگیں روچاں زیارت ءَ لشکریاں بیڑ ءِ نیام ءَ پیسر ءَ چہ دزگیر کُتگیں بیگواھیں مردم دروگیں میڑے ءِ تہءَ کُشتگ اَنت کہ اِشی ھلاپ ءَ وائس فار بلوچ مسنگ پرسنز، نیشنل ڈیموکریٹک پارٹی، بلوچ یکجہتی کمیٹی ءِ سروکی ءَ بیگواھیں مردمانی کھول گوستگیں سئے روچاں چہ بلوچستان گورنر ھاؤس ءِ دیما زھرشانی ننداک ءَ نشتگ اَنت۔