نبشتانک: ابدمانیں کارِست
(شَے مُریدیں رَزا)
نبشتہ کار : مھسود بلوچ
دی بلوچستان پوسٹ
“من کہ رَزا جھانگیر باں بچّ ھمّل ءِ پدگیر باں”
“بنداں کتار پہ سنگراں، بالاچ مری بالاچ مری “
اَگاں ما وانگ ءُ چارگ بِہ لوٹ اِیں گُڑا بلوچ راجی آجوئی ءِ جُنز ءِ تَہ ءَ بازیں کارِست اَتکگ ءُ مارا اِلم ءُ زانت، راجی جُنز ءُ بلوچے بَزگی ءُ دِرتہ پُچی پادشِپادی ءَ ھوار بندیگیں گُلزمین ءِ پجّار ڈسّ اِتگ اَگاں ما آجوئی ءِ راہ ءِ گِچین کنگ ءَ سوبمند نہ بوت آں گُڑا پہ بلوچ ءِ زندمان ءَ رُژناہ ءُ گورگیں بام کدی وتی بانزُلاں ایر نہ دنت-
ھمے کارِستانی تَہ ءَ یکے نمیرانیں رَزا جان اَت، رَزا ءَ بلوچ راج ءِ بزگی ءُ اِیردستی کسانی ءَ مار اِتگ اَت ءُ بلوچ وانندگ گَل آزاد ءَ ھوار بیت وتی شپ روچی ئیں جُھد کوشستاں گَل ءِ سکٹری جنرل ءِ اُگدہ ءِ زمہ واری ءِ زورگ ءَ سوبمند بیت ، بی ایس او آزاد ءِ دیمروئی ءُ آجوئی ءِ کُلوہ ءَ ھر ھند ءُ میتگ ءُ وانگجاھاں سر کنت پَمشکا تئی جتائی ءِ درد انچو ارزان نہ انت کسّ ءِ شموشت بِہ کنت، رزا جان ءِ مِھر پہ گُلزمین ءَ اَنچوش اَت بس رزا ءِ نیاد ءُ مجلسانی تَہ اِلم ءُ زانت ءِ گپ اَت مِھر ءُ مھروانی ءِ سکین ترا گندگ ءَ اَتک، دْژمن ءِ بگیری ءَ نَپرت ءِ سکین رسّ اِتگ اَت ءُ آئی ءِ شپ روچی ئیں جُھد ءُ کوشست ھمیش اَت راج آجو بہ بیت کہ آوُکیں راجی پدْریچ یک وشھالیں زِند ءِ بِہ گْوازین انت۔
ھَو! رزا ھچبر شموشگ نہ بیت، رَزا جان ءَ وتی بلوچ راج ءِ اِیردستی ءُ بزگی دیست چہ گُلامی ءِ بدیں واب ءَ بُست کُت ءُ ھزاراں ورنا پیر ءُ کماش مات گوھار بلوچ جُنز ءِ ھمراہ ءُ درد وار کُت انت، رَزا جان نمیران بوھگ ءِ روچ ءَ ھم وتی گَل ءِ کاراں گوں گُلائش اَت ءُ شپ جاہ ءُ روچ جاھے اَت-
یک روچے رزا جھانگیر وتی مَکھیں مات ءَ گْوش اِیت کہ منی نمیران بُوَگ ءِ ھال کہ ترا سر بیت گُڑا مہ گریو اِت بلکیں شادمانی کن اِت، ھَو وھدیکہ رَزا پہ گُلزمین نمیران بیت گُڑا رَزا جان ءِ مَھکیں مات ءُ گوھار، دوست ءُ سنگت پہ ھَلو ھالو پہ نازینک ءُ چوگان گُلزمین ءِ مَیار کن اَنت۔
رَزا جان تو چو سرپد ئے کہ چہ ترا پد تئی ھمراہ ءُ ھمکوپگیں چنچو ھمبل تئی رندگیری ءَ اَتک ءُ پہ وتن نمیران بوتگ اَنت، بابا جان، بالودست، کسانسالیں میرل جان تاھیر جان ءَ وتی سالونکی ئیں واھگ پہ گُلزمین ندْر کُت اَنت (رزا جھانگیر) بندیگیں ڈیھ ءِ آجوئی ءِ بیرک اِنت آجوئی ءِ چیدگ اِنت شَے آجوئی ءِ سپر اِنت کہ جنزاں اِنت شَے ءِ پاک ءُ پلگاریں ھون سرجمیں جھان ءَ پہ آجوئی ءِ مستاگ بَہ اَنت، چو رمبوکیں نوکاپ ءَ رُمبان اَنت داں وتن آجو نہ بیت۔ وھدیکہ سرگْوات کشّ اِیت گُڑا پہ پھر ءِ شے مرید ءِ داتگیں مھرانی یاتاں گیج اِیت۔ وھدیکہ شَے ءُ امداد جان انگیر کنگ باں گُڑا امداد جان جُست کنت چِی بہ کن آں شے ءِ استال دْروشمیں پَسو ھمے بیت جنگ کن آں دانکیں دْژمن بہ زانت من ھالو ھلو باج ءَ نہ بَراں من کسان اِتاں وھدیکہ رَزا جان وتی ھَلک تیرتیج ءَ آرگ بیت گُڑا ھزاراں مھلوک وتی راجی پُسّگ ءَ پہ شانیں کار اَنت ءُ گُلزمین ءِ مَیار کن اَنت بلے من ءَ اَنچو سما بوت کہ منی چمانی رُژن شُتگ، ھمے ساھتاں چمانی ارس ترمپ ترمپ ءَ رچان ءُ ملور ملور ءَ نشتگ اِتاں ھمے سما بُوَان اَت آزمان سرا کپتگ ھر دمک ءُ در تھار رَزا جان تئی نمیران بوھگ ءَ پد تئی بابا بکتیار ھم تئی دوری ءَ سگ اِت نہ کنت نمیران بیت، گُڈی ءَ ھمے گْوش آں شے ترا ءُ نمیرانیں امداد بجیر ءَ شھیدی مراد بات سرزمین ءُ راج آجو بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔