ائید ءِ روچ ءَ زورانسری آوار جنگ بوتگیں مردمانی ھاتر ءَ زھرشانی ءَ بھر بہ زور اِت – ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ چار ھزار ءُ شش سد ءُ نود ءُ شش روچ سرجم بوتگ انت –
مروچی سیاسی ءُ چاگردی باسک عبدالنبی بلوچ، فضل بلوچ ءُ دگہ مردماں بنجل ءَ اتکگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچانی راجی ھکانی جھد ءَ دیر انت اشی ءِ تہ ءَ بلوچ پرزندانی دیمھونی ءِ دراجیں لڑے کہ زورانسری آوار جنگ ءُ شھید بوتگ انت، ھزارانی کچ ءَ بلوچ پرزند روچ مروچی ریاستی زنداناں ازیت سگگ انت –

آئی ءَ گوشتگ کہ مئے گور ءَ رسانکدر ءُ سیاسی پختگی نہ بوگ ءِ سوب ءَ تنی وھدی سرجمیں رپورٹ نیست انت، بلے ھو سال دوھزار ءَ پد بلوچ جھدے تہ ءَ باز پختگی اتکگ، مردم یکجاہ بوتگ انت ءُ دنیا اے زلم زوراکیانی درگت ءَ سرپدی داتگ – ما درستانی ھمے جھد انت کہ ریاستی ھنراں بہ پھم ایں ءُ گل ءِ رھبندانی رِد ءَ وت ءَ مھکم بہ کن ایں – ما زورانسری آوارجنگ ءُ درکانودی کُشگ بوتگیں مردمانی لڑ ءِ جوڈ کنگ ءَ سوبین بوتگیں کہ وی بی ایم پی ءِ جھدے برورد انت –

آئی ءَ گوشتگ کہ ائید ءِ روچ ءَ کہ سرجمیں دنیائے مسلمان اے وشی ءِ روچ ءَ وتی کھول ءُ سیاد ءُ وارثاں گوں پہ وشی گوازینیت بلے ریاستی زواکیانی آماچیں بلوچ راج ھمے روچ ءَ ھم وتی گِس ءَ نشت نہ کن انت ءُ اے روچ ءَ پہ وشی گوازینت نہ کن انت ، ھزارانی کچ ءَ بیگواھیں مردمانی کھول ھمے روچ ءَ وتی دوستگیں مردمانی یل کنائینگے ھاتر ءَ گِساں در کائینت پریس کلبانی دیم زھرشانی کن انت-

آئی ءَ گوشتگ کہ مدامی ایں وڑا اے ائید ءَ ھم کراچی، شال ءُ تربت ءَ زورانسری آوار جنگ بوتگیں مردمانی کھول ءِ نیمگ ءَ روانک کشگ بیت اِنت ءُ زھرشانی کنگ بیت ما چہ بلوچ راج ءَ دزبندی کنیں کہ آ در بیا انت ءُ اے کھولانی ھمراہ داری ءَ بہ کن انت –