باڑو کشیں کوچ شال داں پنجگور ءُ کیچ ءَ رؤکیں نودربرانی باڑواں کم بہ کن اَنت – نودربر

بلوچستان ءِ بنجاھی شھر شال ءَ دو شمبے ءِ روچ ءَ پریس کلب ءِ دیم ءَ مکران ءَ سیادی داروکیں نودربراں مکران ٹرانسپورٹرانی بگیری ءَ زھرشانی کتگ –

زھرشانی کنوکاں شال تاں کیچ، پنجگور ءُ گوادر ءِ مساپر کشیں کوچانی باڑوانی گیش کنگ ءَ پدردی درشان اتگ ءُ ٹرانسپورٹر ءُ انتزامیہ ءِ بگیری ءَ اوگام جتگ –

ترانکارانی تہ ءَ بی ایس او پجار شال ھنکین ءِ انفارمیشن سیکرٹری شے مرید رشید بلوچ ءَ تران کنان گوشتگ کہ گرانھادی ءَ لس مھلوک ءِ ھاتر ءَ زند گوازینگ گران انت ءُ دومی نیمگ ءَ کیچ گوادر، پنجگور ءَ ھم کوچ کہ شال ءَ رو انت آھانی کرایہ ءِ تہ ءَ دو ھمینچو گیشی کنگ بوتگ چریشی ءَ شال ءَ وانوکیں نودربر دلسیاہ انت – مکران ءِ کمشنر ءُ شال ءِ ڈی سی ٹرانسپورٹانی ھدابنداں مکن بہ کن انت کہ آ وتی مرزی ءُ منشا مہ کن انت ھما کہ کانودی کرایہ انت ھماھی ءَ بہ گر انت شال ءَ وانوکیں نودربراں مُز بہ دے اَنت –

سول سوسائٹی بلوچستان ءِ سرکماش گلزار دوست ءَ گوشتگ کہ لس مھلوک ءُ بلوچ نودربرانی ھاتر ءَ گیشیں جنجال آرگ بوگ انت ٹرانسپورٹر مافیا ھما کرایہ کہ پیسرا شال تاں مکران ءِ 1500 بوتگ پاکستانی پٹرول گیش بوھگ ءِ ھمراھی ءَ اے ھم ڈبل کنگ بوتگ نوں مکران تاں کیچ کرایہ سَے ھزار کنگ بوتگ کہ چریشی ءَ نودربر بازیں اڑ ءُ جنجالانی دیمپانی ءَ کنگ ءَ انت –