ٹی بی پی اھوال پتر ءَ سر بیتگیں ھالانی رد ءَ 26 اپریل 2022 ءَ کراچی شھدربرجاہ ءَ بیتگیں فدائین اُرش ءَ پد دیم ءَ اتکگیں نوکیں اھوالانی رد ءَ کراچی شھدربرجاہ ءَ ھوار سرجمیں پاکستان ءَ ھمک جاہ ءَ کہ کنفیوشس سینٹر وانینگ ءَ بیتگ اَنت آھاں وتی سینٹر بند کُتگ اَنت ءُ پد ءَ وتی ڈیھ بزاں چین ءَ واتر بیتگ اَنت۔
اھوالانی رد ءَ چین ءِ سرکار ءَ وتی اُستاد ءُ دگہ کارمند آھانی سر ءَ بیوکیں بی ایل اے مجید برگیڈ ءِ فدائین اُرش کہ آئی ءِ تہ ءَ بی ایل اے ءِ اولی جنین فدائیں شاری بلوچ ءَ سئے چینیاں ھوار چار مردم کُشتگ اَت ءُ بازیں ٹپی ھم کُتگ اَت ءُ چہ اُرش ءَ پد ودی بیوکیں جاورانی سوب ءُ پاکستانی سرکار ءِ نیمگ ءَ پھازگی دیگ ءَ بے سوبی ءِ سوب ءَ کنفیوشس سینٹراں ھواریں کلیں کارمند پدءَ لوٹارینتگ اَنت۔
رسانکدراں گوں تران کنان ءَ یک پھازگی لشکریانی کارمندے ءَ وتی نام پدر نہ کنگ ءِ مسام ءَ گُشتگ کہ جاورانی گندگ ءَ انچش گمان بیت کہ نی چائینیز واتر نہ بنت ءُ واکداراں پیسلہ کُتگ کہ نوں وانگ ءَ آنلائن برجاہ بہ دار اَنت۔
زانگ بہ بیت کراچی شھدربرجاہ ءِ تہ ءَ بستگیں کنفیوشس سینٹرءِ کارمندانی سرءَ 26 اپریل 2022، ءَ ھما وھد ءَ اُرش بیت کہ وھدے چینی استادانی اولاک دگ ءَ گوزگ ءَ بیت۔ اے اُرش ءَ سئے چائنیز مردم کنفیوشس سینٹر ءِ کارمستر ءُ دو دگہ اُستاد کُشگ بنت ءُ دگہ مردمے ھم کُشگ بیت اِنت۔ اُرش ءِ زمہ واری ءَ بلوچ آجوئی لوٹوکیں سلاہ بندیں گل بی ایل اے ءِ مجید برگیڈ من اِت ءُ گُش اِیت کہ بی ایل اے ءِ اولی جنین ءِ فدائین شاری بلوچ ءَ کراچی ءَ کنفیوشس سینٹر ءِ سر ءَ اُرش کُتگ ءُ بی ایل اے مجید برگیڈ گیشتر اُرشانی بیھار دیان ءَ چائینہ ءَ گُش اِیت کہ بلوچستان ءَ چہ در بہ کپ اِیت اگاں ناں بی ایل اے ءِ تہ ءَ فدائیں اُرشکارانی یک مزنیں کساس ءِ پہ مول ءُ مراداں ندر بیگ ءَ ساڑی اَنت۔