منی گُلیں راج ءِ بانُکیں گْوھاراں
نبشتہ کار: امبر ھُسین
دی بلوچستان پوسٹ
شما ھرکجا اِت، وش ءُ گَل ءُ شات بات اِت، درد ءُ گم ءِ گْوات شمئے نزیک ءَ مَہ کشات ءُ مُدام وشیانی ساھگ ءَ بہ بات اِت۔ انچوشکہ ما سرپد ایں کہ ھر راجے ءِ نیم آبادی آئی ءِ زالبول اَنت، ھمے ھاتر ءَ گْوشگ بیت کہ ابید چہ زالبولانی کِرد ءَ یک راجے ءِ دیمروئی بلاھیں گرانیں کارے بیت۔ بزاں بے زالبوال ءِ دیمروئی ءَ یک راجے دیمروئی نہ کنت۔
او منی ھمسریں گْوھاراں، من چو آ دگریں فیمینیسٹانی وڑ ءَ شمارا اے نہ گْوش آں کہ پہ وتی ھکّ ءِ ھاتر ءَ وتی بْرات، پِت ءُ لوگ ءِ ایدگہ مردینانی ھلاپ ءَ چِست بِہ بَہ اِت پرچیا کہ من ھمے سرپد باں کہ یک گلامیں راجے ءِ زالبول باید اِنت اول وتی راج ءِ گُلامی ءَ بہ مار اَنت ءُ گلامی ءِ مُھریں سانکلانی پْروشگ ءِ جُھد ءَ بکنت ناں کہ گوں وتہ جِند ءِ مَرد ءُ بْرات ءَ گوں جیگ ماں جیگ ءُ دپ ماں دپ بِہ بیت۔ مارا گوں ھورت نگاھی ءَ دراھیں جاورانی سبب زانگ لوٹ ایت چوشکہ اگاں یک چاگردے ءِ تہ ءَ مارا چہ زالبولاں گیش مردین ءَ ارزشت دیگ بیت ءُ مئے واست ءَ بندش گیشتر اَنت، گُڑا زاناں ایشی ءِ پُشت ءَ سبب چے اِنت؟ زاناں مئے پت ءُ بْرات ءُ مرد اَنت؟ مارا چہ وت ءَ اے جُست کنگی اِنت کہ مئے پت ءُ بْراتاں زاناں چہ کُجا ونتگ ءُ دراھیں چیزاں سرپد اَنت کہ مئے ھما بندشاں ھلاس بہ کن اَنت؟ آ وَ ناوانندگ ءُ چَہ گیشیں چِست ءُ ایراں ناسرپد اَنت ءُ آیانی اے ناسرپدی ءِ سبب اِش اِنت کِہ ھما زوراوریں تاکت کہ مارا ایردست کُتگ ئِے ھمائی ءَ مئے پت ءُ بْرات ناوانندگ داشتگ اَنت، مارا ءُ شمارا اے سرپد بوگ لوٹ ایت کہ مئے راج گلام اِنت ءُ ما یک گلامیں راجے ءِ زالبول ایں، گُڑا یک گلامیں چاگردے ءِ تہ ءَ نِندگ ءُ تھنا پَہ وت ءَ آجوئی ءِ لوٹگ دگہ وڑیں گپّے بیت! دانکہ تئی راج چہ گلامی ءِ سانکلاں آجو نہ بیت، تو گُلامے ئے، تو وتی مرد، برات ءُ پِت ءِ اِنا بلکیں ھما زوراوریں تاکت ءِ گُلام ئے کہ مرچی تئی زمین ءِ سر ءَ آتکگ ءُ ترا ایر دست کُتگ ئِے۔
اگاں ما زالبول، مرچی گوں وتی جِند ءِ آجوئی ءِ جُھد ءَ دزگٹ بِہ بَہ ایں، گُڑا اے پہ مئے راجی آجوئی ءِ راہ ءَ بلاھیں ڈوکے بیت مئے راجی آجوئی ءِ جُنز اوشت ءِ آماچ بیت ھمے ھاتر ءَ من گْوش آں کہ بِل اِت وتی زات ءَ بلکیں راج ءِ گم ءَ کوپگ ءَ بزور اِت۔ بگِند ئے منی ءُ تئی زند ءَ راج آجو نہ بوت بلے کم چہ کم اے جاور کہ مئے سر ءَ گْوستگ اَنت، مئے آیؤکیں پدریچ ءِ سر ءَ مَیا اَنت، یک گلام ءُ ایردستیں راجے ءِ زالبول وھدیکِہ تھنا پہ وت ءَ بِہ جیڑ ایت ءُ چہ راج ءَ بے سُد بِہ بیت گُڑا آ راج ءِ گلامی ھچبَر ھلاس نہ بیت بلکیں روچ پہ روچ گُلامی ءِ ھُنڈال مئے زمین ءَ جھل ایر کپاں بَنت۔
زوراوریں تاکت ءَ بگند کہ ھر وھد ءَ ھمے جُھد ءَ اِنت کہ مارا بلوچ زالبولاں، ھاس نودربراں، گوں وتی زات ءَ بندوک بہ کنت ءُ پہ راج ءِ رَد دیگ ءَ یکشل ءَ جُھد ءَ اِنت۔ پہ درور ما مرچی انیتہ جلیل ءَ گِند ایں کہ سرکار مرچی ءَ آئی ءَ پرچی ءَ کُمک ءَ کنگ ءَ اِنت ؟ پرچیا کہ انیتہ جلیل پہ دُژمن ءَ یک انچیں کارے کنگ ءَ اِنت کہ پَہ مئے راج ءَ بلاھیں تاوان اِنت گُڑا انچیں بازیں زالبول ھم ھست اَنت کہ مرچی انیتہ ءَ وتی رولماڈلے لیکھ اَنت ءُ آئی ءِ رندگیری ءَ کنگ ءَ اَنت۔ وھدے کہ تو گْوادر ءِ تیاب ءِ دپ ءَ رو ئے گُڑا تو بازیں کسانیں جنکو گِند ئے کہ پہ سرکار ءِ دْروگیں ستا ءُ پوتاری ءَ ویلوگ جوڑ کنگ ءَ اَنت۔ سرکار لوٹ ایت کِہ انیتہ چو یک رولماڈلے ءِ پیم ءَ دیم ءَ بئیت کہ دِگہ کسانسالیں جنک ھم آئی ءِ رندگیری ءَ بہ کن اَنت ءُ گوں ویلوگ ءُ ٹِک ٹوکاں انچو دسگٹ بِہ بنت کہ آ چہ زُبان دوستی ءُ راجدوستی ءَ دُور بِہ بنت، آیاں وتی راجی پجّار، آجوئی ءِ بستار، راجی زُبان، دود ءُ گلامی ءِ ھچ سما مہ بیت بلکیں چو گُنگدام ءِ وڑ ءَ بے سما بہ بنت کہ ھچبر گُلامی ءِ مہ مار اَنت۔ پد ءَ بلوچ زالبول اے وڑیں بدبھتینانی رَندگیری ءَ کنان ءَ رَد بہ کپ اَنت چریشی ءَ تیوگیں بلوچ زالبول رَد بہ کپ اَنت ءُ سرجمی راج گیشتر مجگی گلام جوڑ بہ بیت۔
او منی راجدوستیں ھمبلاں، گُڈسر ءَ بس ھمینچو گوش آں کہ مارا دگہ رولماڈل باز اِنت کہ مرچی آ پہ مئے راج ءَ ھمکار ءُ راج ءِ ھزمت کنگ ءَ اَنت۔ کامریڈ آمنہ، بانُک ماھرنگ، ڈاکٹر سبیہ بلوچ، بانک سدیہ بلوچ، بانُک سمی دین بلوچ کہ ما گند ایں پہ وتی گاریں پس ءُ براتانی شوھاز ءَ بازیں وھدے بیت جُھد ءَ اَنت اے ھما بلوچ شیرزال اَنت کِہ پہ مردیں آدماں جُھد ءَ اَنت، آیانی ھلاپ ءَ نا! مارا سرکار ءِ داتگیں رولماڑلانی پکار نیست۔ مارا وت رولماڑل ھست، مارا وتی راجی رولماڑلانی رندگیری کنگی اِنت ناں کہ انیتہ زلیل ءِ وڑیں سرکاری دپچٹ ءُ کاسگ چٹّاں دلگوش ءُ رندگیری کنگ لوٹ ایت۔ بلوچ شالا یکمُشت ءُ تپاک بہ بات اَنت ءُ ماں یک آزات ھیال ءُ راجمستریں چاگِردے ءَ بلوچ زالبول دیمروئی بہ کنات۔آمین۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔