وائس فار بلوچ مسنگ پرسنز ءِ چیئرمین نصراللہ بلوچ ءَ پاکستانی سروزیر شھباز شریف ءِ شال ءَ آیگ ءِ وھدءَ زورانسری بیگواھی ءِ آماچیں مردمانی یل کنائینگ ءِ لوٹ کُتگ۔
نصراللہ بلوچ ءَ گُشتگ کہ باندہ شھباز شریف یک روچی تر ءُ تاب ءِ ھاترءَ شال ءَ پیداک اِنت ءُ آ دیمروی پیکجزانی جار ءَ ھم جنت بلے آئی زانت ءِ تہءَ بہ بیت کہ بلوچستان ءِ مھلوکءَ گوں ھمک اھد ءَ بے انساپی ءُ زوراکی بیتگ کہ اِشانی درگت ءَ آئی ءِ پاٹی ءَ ھوار درستیں سرکار اڈ کنوکیں پاٹی ءَ من اِتگ ءُ پدءَ بلوچستان سرجمی ءَ ڈالچار کنگ ءِ روش برجاہ داشتگ ءُ ڈیھہ ءِ سلامتی ءِ نام ءَ بلوچستان ءَ تاگت ءِ کارمرز کنگ برجاہ دارگ بیتگ کہ اِشی پُشدر ءَ بلوچستان ءِ مھلوکانی بگیری ابید قانودی گامگیج زیرگ بیتگ اَنت ءُ انگت ھم بئیگ ءَ اَنت۔
آئی ءَ گُشتگ کہ بلوچستان ءَ مردم بیست بیست سالاں چہ زورانسری بیگواھیانی آماچ اَنت آیانی کھولاں آیانی درگت ءَ ھچ پئیمیں اھوال دیگ نہ بئیگ ءَ اِنت بیگواھیں مردمانی لوگ بانک، چُک ءُ کماشیں مات ءُ پِت آیانی راھاں چارگ ءَ اَنت ءُ ذھنی جنجال ءُ زوراکیانی تہءَ زند گوازینگ ءَ اَنت۔
نصر اللہ بلوچ ءِ گُشگ اَت کہ بلوچستان ءَ چہ پیکجاں گیشتر بلوچانی ٹپانی سرءَ مرھم جنگ ءِ زلورت اِنت ما سروزیر ءَ گوں دزبندی کنیں کہ بلوچستان ءَ رھبند ءِ مستری ءَ باوری کنگ ءَ ھوار بلوچاں گوں برجاھیں زوراکیں روش ءُ ابید قانودی گامگیجانی دارگ ءُ بیگواھیں مردمانی یل کنائینگ ءُ زورانسری بیگواھیانی جیڑہ ءَ ڈیھہ قانودانی ردءَ گیشینگ ءِ تہءَ وتی کرد ءَ پیلو بہ کنت ءُ بلوچستان ءِ مردماں باوری بہ دنت کہ آیانی گوما بیتگیں زلم ءُ زوراکیانی ھساب دیگ بیت اِن۔
نصراللہ بلوچ ءَ دیمترا گُشتگ کہ بیگواھیں مردم ءُ آھانی کھول ھم ھمے ڈیھہ ءِ شھری اَنت ءُ آیانی گوم ءَ ھم ڈیھہ ءِ رھبند ءِ ردءَ گام زیرگ بہ بیت ءُ آیانی مھرومیانی ھلاس کنگ ءِ ھاترءَ کار آمدیں گامگیج زیرگ بہ بنت۔
دومی نیمگ ءَ شال پریس کلب ءِ دیما وائس فار بلوچ مسنگ پرسنز ءِ زھرشانی بنجل ءَ مروچی 4652 روچ سرجم بیتگ اَنت، اے درگت ءَ این ڈی پی کے بنجاھی اگدہ دار عبدالغنی بلوچ، ثناء بلوچ ءُ اشفاق بلوچ ءَ بنجل ءَ اتکگ ءُ یکجاھی درشان اِتگ۔