نبشتانک: زندگی ترا کجا ھست؟
نبشتہ کار: شاھد اھمد
دی بلوچستان پوسٹ
کَسّے زانت اے تِپل کَے اِنت؟ من ءَ بہ گْوش اِت او! بنی آدم من ءَ بہ گْوش کہ اے تِپل ءَ چے بوتگ یک نیمگے ءَ ھون ءِ ھار دیم ءَ چو پیشّارگ ءَ اِنت؟ ءُ دومی نیمگ ءَ اے تِپل ءَ بچار اِت گوں وتی وش ءُ وشیں دیم ءَ کندگ ءَ اِنت ؟ اے کَی زَھگّ اِنت؟ من ءَ اے تپل ءِ سر ءَ گریوگ پیداک اِنت ءُ پد ءَ من ءَ گْوش ایت ھمت ءُ جبزگے ءَ من ءَ سکین دیگ ءِ جُھد ءَ اِنت منی تِپل۔
من ءَ ھم ھُدایے ھست گْوش ئِے بلے من نہ زان آں اے ھدا کُجا اِنت؟ باریں بس من اے اُمیت داشت کن آں کہ یک روچے منی ھُدا کَیت منی درد ءُ دوراں ھلاس کنت ءُ یک وش ءُ وشھالیں زند ءِ گْوازینگ ءَ زندے دنت۔
بس دگہ چے اُمیت کن آں کدی باریں کیت مئے زَھگ، زالبول ءُ کماشاں آسودگ کنت؟ او ! بنی آدماں شما چو رستر جوڑ بوتگ اِت ءُ شمئے مارگ ءِ جند،سما کنگ ءِ مارشت کُج اَنت؟-
من ءَ گمان بوت کہ اے تِپل یک بلوچے نہ اِنت ءُ زاناں بلوچ انسان نہ اَنت کہ دگنیا ءِ دوداں بلوچ بس پشکپتگ اَنت؟ اگاں من بلوچے آں گڑا منی بلوچیت کج اَنت؟ چی ءَ کہ من ھم وت ءَ بلوچے سما بوھگ ءَ آں بزاں من بلوچے آں۔ بزان اِت اے تِپل ھم یک بلوچے بلے ایشی ءِ میار ھمیش بیت کہ اے بلوچے۔
زاناں بلوچ بوھگ ھزاب اِنت ؟ اگاں ھزاب اِنت گڑا بلوچ مات ، کماش ءُ مئے بلوچ ورنا پرچا جار نہ جَن اَنت اگاں جار نہ جَن اَنت اے زُلم ءِ بگیری ءَ گڑا ھمے پَھمگ بیت کہ مارا زبانے نیست کہ اے زُلم ءِ ھلاپ ءَ گپ بہ کن ایں چی ءَ کہ زبان بُرّگ بیت اگاں کَسّے ءَ گپ جَت۔
زندگی ترا کُجا ھست کہ مَرگ ءَ تُرس اِت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورکایشانی منّوک بہ بیت یا اگاں اے گل ءِ پالیسیانی درشانی اِنت۔