نبشتانک: نمدی یے پہ وتی شھیدیں ھمبل سکندر دوست ءَ
نبشتہ کار: ھپیز اولیا ء
دی بلوچستان پوسٹ
چیھال اِنت منی پلو جان تو وش ءُ جوڑ برابرے امیدیں تو وش بہ ئے مئے دعا اِنت کہ مدام انچو وش بات ءُ گل بات ئے مرچی ما چہ سک باز دور ءَ چار اِت کہ تو گلزمین ءِ میار گنک بوت ئے دل ءَ گوشت کہ مرچی تئی واست ءَ نمدی یے نبشتہ بکن ءُ دیم بدے ھمائیں تئی شھیدی یے ھال اتکگ من وت نزاناں پہ تو چے نبشتہ بکناں بلے لھتے گپ پتو لکیر کشاں ایشاں تو بوان گوں تئی منت وار باں گپ ءَ نزاناں من کجا چہ بندات بہ کناں چیا کہ مئے یک بھرے کسانی اَت کہ ما شما مدام یک جاہ اِتیں بلے آ گپاں مرچی بل مرچی من تئی ھما گپ آں نبشتہ کناں کہ تو پہ یک مکسدے ءَ زرتگ اتاں ھما وھد ءَ من ءَ ھال رس اِت تو گوں دگہ لھتے سنگتاں وتی ماتیں گلزمین ءِ رکینگ ءَ شتگت ئے تئی ھمراھی ءَ ترا بلکیں یاد بہ بیت بازیں سنگتے اے جھد ءَ ھوار بوتگ اَت بلے ما چار اِت بازیں سنگتے چہ اے ماتیں گلزمین ءَ دور دراں ڈیھہ بوت لھتے ءَ سرینڈر کت لھتے شھید کنگ بوت بلے تو انگت ءَ وت ءَ را مھکم کتگ اَت جنگ اِت ئے تو زان ئے اے گلزمین ءِ مھر اِنت تو من ءَ مدام گوشتگ اَت کہ جنگ الم ءَ کنگی اِنت اے جنگ ءَ ما مرچی مہ کنیں باندا مئے پدریچ مارا میاریگ کنت پد ءَ تو زان ئے اے وھد ءَ کہ ما جوان اِتیں گلزمین ءِ جنگ ءَ مارا وتی مرید کتگ اَت بگندے تو ھم وتی نام ءَ ھمے واستا مرید کتگ اَت کہ تو ھم گلزمین ءِ یک مریدے بوگ ءِ واب دیستگ اَت ھما مرید کہ پہ ھانی ءَ مدام گنوک اَت پہ ھانی ئے رکینگ ءَ وتارا ملنگے کت ءُ سرے پہ مدینہ ءَ کپت چیا کہ آ وتی ھانی ءِ لوٹگ ءَ شتگ اَت آ وتی ھانی ءِ رکینگ ءَ شتگ اَت بلے تو مرچی ھما مریدے دستان ءَ دگہ رنگے دات تو بلوچ راج ءَ اے ھال دات کہ ما درست مرید اِنت مئے ھانی چہ زالمیں زورکاں چہ مارا پُل اتگ مارا ھانی چہ زوریں چاکر ءَ پچگرگی اِنت مرچی تئی اے جھد ءَ من بے ھیال مہ باں دہ (10) سال ءَ چہ برز اِنت کہ اے تو پہ وتی ھانل ءِ رکینگ ءَ در کپتگ ئے اے دراھیں سالانی توک ءَ ترا بازیں چست ءُ ایرے کنگ کپت من ھوں زاناں کوھے روگ ءُ گوں اے یزیدے لشکر ءَ مڑگ وتی ھانل ءَ پچگرگ اِنچو ارزان نہ اِنت-
بلے اے ھانل ءِ مھر ءَ کجا کن ئے ستر بہ لوٹ ئے وت ءَ را چہ اے گرانیں سھت ءَ دور بدارے بلے نہ بیت چیا کہ مھرے انچیں لزتے کہ ترا سک بے کرار کنت مھر مردم ءَ انچو بے وس کنت کہ دگہ ھچ کنگی نہ اِنت بس ھما کاراں کہ تو در کپتگ ئے ھما کارا گوں دیم ءَ رواگی اِنت یک انڈین پلمے ءِ بگندے تو ھم چار اتگ بلے پد ءَ ھم منی دل گش ایت ترا بہ گوش ئے آ پلمے نام ءَ من وت نزاناں بلے یک کسانیں سین پارٹ ئے منی دیم ءَ گوستگ “یک مردے نماز وانگ ءَ اِنت ھما نمازی یے دیم ءَ یک مردے گوز ایت گڑا ھمے نمازی وھدے وتی سلام ءَ چکارینی گش ایت او بچازاناں تو کورے کہ من اد ءَ نماز ءَ آں پد ءَ تو زان ئے دیم ءِ مرد چے جواب دنت گوش ایت من پہ وتی مجنوئے شوھاز ءَ در کپتگ اَنت من ترا ھیال نہ کتگ من ءَ پھل کن کہ من تئی نماز ھراب کتگ ” اے مرد مھر ءَ انچو کتگ اَت آئی ءَ دگہ ھچ چیز گندگ ءَ نیتک بَگیر چہ وتی ھما آشک ءَ کہ آئی ءِ واستا در پہ در اَت، مرچی من ھوں زاناں آ کجام گرانیں بار اَت کہ وتی کوپگ ءَ زرتگ اَت اے بارے چست کنگ ءَ مزنیں دلے لوٹ ایت کزا یکے چو تئی وڑیں جوانُمردے در بیت ءُ گوں لشکر ءَ جنگ بہ کنت پد ءَ ترا چنچو مردماں تنگ کت ھبر دات بلے تو گوشت اناں مرگ ءَ یکے روچے آیگی اِنت مہ پہ مرگہ ترس ءَ وت ءَ را لگوارے ءِ نام ءَ بدے آں ءُ وتی سنگتاں یل بکن آں ءُ باجو بہ باں اے گوں من نہ بیت تئی تہ ءَ اے سلاھیت ھست اَت کہ تو وتی دیم ءِ مردم ءَ چتو وتی گپ ءِ منوگر بہ کن ئے کہ اے مئے ماتیں گلزمین گلام اِنت اے مارا ءُ شمارا رکینگی اِنت شما مئے ھمراہ نہ بے مہ ب ئے بلے مارا بل اِت کہ ما گوں اے یزیدے لشکر ءَ جنگ کنیں وتی گلزمین ءَ چہ اے رستریں زالم ءَ پچگریں ءُ بلوچ بوگ ءِ ھک ءَ اد ءَ کنیں، من ءَ تئی یک گپے مدام یات کیت تو بلکیں بے ھیال بہ بے ترا یاد کنت لھتے مردماں ترا گوشتگ اَت کہ سر گوں سنگ ءَ میڑینگ نہ بیت تو گوشت ما سر مڑینتگ ءُ سنگ تلیں بس کمو پشت کپتگ شما وتی ھمت ءَ بدار اِت مئے گلزمین زوت چہ اے پلتیں رسترا چے آجو بیت ءُ ما مدام یک وت واجھی ءِ واجہ بہ ایں پلو جان گپ باز اَنت گوں ترا تئی ھمائیں شھیدی یے ھال اش کتگ من نزانتگ کہ من تئی کجام کسہ ءَ بیاراں ءُ ترا کجا چے بندات بہ کناں دومی نیمگ ءَ تئی اکسانی چارگ من ھردیں کہ تئی اکس ءَ وتی اے چماں شانک دیاں بگر چہ گریواگ ءُ دلے دردے دگ ءَ ھچ نہ کتگ مرچی ترا گلزمین ءِ میار کنگ بوت تو زان ئے من سک گل بوتاں کہ تئی ھما پکر کہ تو زرتگ ءُ در کپتگ ئے ھما سوچ ءَ تو مرچی سرجم کت ھما ھون کہ تو گوشت اَت کہ گلزمین ءَ زروت ایت کہ من ءَ دیگی اِنت تو دات تو گوشتگ اَت کہ اگاں منی زند ءَ گلزمین آجو بوت ما شما پد ءَ ھم دیوان بئیں گپ ءُ تران کنیں وتی جنگی کسہ آں کاریں تو اے ھم گوشتگ اَت کہ اے گلزمین اِنت مرچی گلزمین ءَ ھون لوٹ ایت پہ گلزمین ءَ سر دیگی اِنت مرچی تو وتی تنگوھیں جان ندر کت پہ ماتیں گلزمین ءَ تنیگیں ھانل ءِ نک ءَ وتی ھون ریتکاں ءُ مدامی وتارا نمیران کت مرچی تئی اولی شپ اِنت من زاناں مرچی تئی دیوان سک بز اِنت گوں ھما رپتگیں شھیدان گوں نشتگے مرچی تو گل ءَ بالے ترا مدام وتی رپتگینانی گیر اَتکگاں وتی کماشیں پتے ءُ وتی تنگوئیں براتے وتی ھما سنگتانی کہ گوں آیاں تو مدام نشتگے کند اِتگ ءُ مزاک ءُ مسکرائی کتگ مرچی تئی دیوان سک بزیں چہ دور ءَ تئی سنگت ءُ بیلی تئی چارگ ءَ اتکگ اَنت ترا تئی شھسواریں سنگتانی جست ءَ کنت ترا تئی ھانل ءِ جست ءَ کن آں مرچی ترا سنگتاں من زاناں بزی کتگ گپ گوں ترا سک باز ھست اِنت بلے مرچی امنچوک ءَ بس کناں ءُ تو مدام مارا گیر کائے بلے اے سھت ءَ ترا من اجازت کناں کہ گپ باز بوت گڑا دگہ رندے من پہ تو نمدی ءِ راھی کناں مئے دعا اِنت کہ تئی جاگہ وش بات اللہ میارے کلیں شھیداں سلام سر کن-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔