بیست ءُ یک مارچ ءَ کلاس نہ گرگ ءِ جار ءِ پلامرزی ءَ کنیں – بساک

بلوچ اسٹوڈنٹس ایکشن کمیٹی ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ بلوچ اسٹوڈنس کونسل اسلام آباد ءِ نیمگ ءَ جار جنگ بوتگیں سرجمیں ملک ءَ کلاس نہ گرگ ءِ پلامرزی کُتگ گوشتگ کہ نودربرانی زورانسری آوار جنی ازاب ءِ جوڈ بوتگ ءُ اشی ءِ تہ ءَ گیشی پدردی یے ھمے ھاتر ءَ بیست ءُ یک مارچ ءَ کلاس نہ گرگ ءِ جار ءِ پلامرزی ءَ کنیں ءُ بلوچستان ءَ دگہ نودربراں چہ لوٹ کنیں کہ آ ھم ھمیشی ءِ بھر بہ بنت –

آئی ءَ گوشتگ کہ بلوچستان زانت ءُ زانشت ءِ ھساب ءَ پشت کپتگیں سوبہ ءِ زانگ بیت ھمود ءَ چہ ھزارانی کچ ءَ نودربر وتی زانت ءِ تُن ءِ پُروشگ ءَ پنجاپ ءَ ھوار دگہ سوبھانی نیمگ ءَ کائینت کہ اود ءَ آھانی گوم ءَ مدامی متعصب رویش دارگ بیت اِنت – ھمے نودربراں گوست ءَ متعصب رویش ءِ دیمپانی کنگ کپتگ وھدیکہ مرچاں آھانی گیرکانودی بید رھبندی پروفائلنگ کنگ بیت ءُ وتی دمگاں آ زورانسری آوار جنگ ءُ بیگواہ کنگ بنت کہ آئی ءِ زاھریں درور قائدآعظم شاھدربرجاہ ءِ نودربر حفیظ بلوچ ءِ زورانسری آوار جنی انت کہ آ وتی جند ءِ دمگ ھزدار ءَ چہ زورانسری آوار جنگ ءُ بیگواہ کنگ بوتگ –

جارکش ءَ دیمتر ءَ گوشتگ کہ اشی ءَ پیش گوستگیں سال ءَ یک نومبر ءَ دو بلوچ نودربر سھیل ءُ فصیح بلوچ زورانسری آوار جنگ ءُ بیگواہ کنگ بوتگ انت – نودربر گلانی نیمگ ءَ زورانسری آوار جنگ بوتگیں نودربرانی یل کنگ ءِ ھاتر ءَ سَے ھپتگ ءَ نندانک جتگ ءُ زھرشانی کتگ ءُ پدا سرکار ءِ گوشگے پد ءَ زھرشانی ھلاس کنگ بوتگ نوں وھدیکہ ھردو نودربرانی زورانسری آوار جنی ءَ پنچ ماہ پرگوستگ بلے نودربر ھنگت یل کنگ نہ بوتگ انت – نوں حفیظ بلوچ ءِ زورانسری آوار جنی ءِ بگیری ءَ اسلام آباد پریس کلب ءِ دیم ءَ دو ھپتگ انت کہ زھرشانی کنگ بوھگ ءَ انت بلے ھستیں وھدے سرکار ھچ وڈیِ گامگیج زورگ ءَ نہ انت –

بساک ءِ بنجاھی جارکش ءَ گڈسر ءَ وتی درشان ءِ تہ ءَ گوشتگ کہ نودربرانی زورانسری آوار جنی زانت دژمنی ءِ شوربندی یے کہ شاھدربرجاھاں وانوکیں نودربر تُرس ءِ آماچ بوھگ ءَ انت – اے وڈیں بے رھبندی املانی بگیری ءَ بلوچ اسٹوڈنس کونسل اسلام آباد ءِ سرجمیں ملک ءَ کلاس نہ گرگ ءِ گامگیج ءِ پلامرزی ءَ کنیں ءُ بلوچستان ءَ ھوار سرجمیں ملک ءِ دگہ نودربر گلاں چہ لوٹ کنیں شاھدربرجاھاں برجاھیں بے رھبندیں املے دارگے ھاتر ءَ اے مھم ءِ بھر بی بنت –