بلوچستان یونیورسٹی آف انفارمیشن، ٹیکنالوجی، انجینئرنگ، مینیجمنٹ اینڈ سائنس ءَ ھستیں وائس چانسلرءِ زوراکیں گامگیجانی ھلاپ ءَ ٹیچنگ اسٹاف ءُ کارداراں “بیوٹمز فیملی” ءِ نام ءَ یک گل ءِ اڈ داتگ۔
گوستگیں روچ ءَ بیوٹمز فیملی ءِ مچی اڈ دیگ بیتگ کہ اِشی تہءَ ٹیچنگ اسٹاف ءُ کارداراں چہ کساس چار سد ءَ گیشتر مردماں بھر زرتگ۔ مچی ءِ تہءَ گُشگ بیتگ کہ شھدربرجاہ انیگیں وی سی ءِ دست ءَ بندیگ اِنت۔ وائس چانسلر ءَ وتی زوراکیں روشاں گوں لوئر اسٹاف، ٹیچنگ اسٹاف ءُ نودربرانی درستیں جمھوری ءُ بُنکی حق دزگیر کُتگ اَنت ءُ یک آمر یے پئیم ءَ شھدربرجاہ ءَ چلینگ ءَ اِنت۔ وی سی ءِ زوراکیں روش ءَ چہ ٹیچنگ اسٹاف، کاردار ءُ نودربر سک تنگ اَنت۔ شھدبرجاہ ءِ تہءَ ٹیچنگ اسٹاف ءُ کار دارانی ھلاپ انتظامی جیڑھانی سرءَ بیرگریں زوراکیانی پدءَ سک باز زھر ءُ رنج گندگ ءَ کئیت۔
آھاں گُشتگ کہ شھدربرجاہ ءَ وی سی ءِ زوراکیں روش، ابید جمھوری گامگیج ءُ شھدربرجاہ ءِ انگیر کنگ ءِ جیڑھانی سرءَ ٹیچنگ اسٹاف ءُ کارداراں بیوٹمز فیملی ءِ نام ءَ یک پتر ءِ اڈ کُتگ کہ اِشی بُنکی لوٹ ٹیچنگ اسٹاف ءُ کارادارانی بُنکی ھقانی پھازگ اِنت۔ مچی ءِ تہءَ وی سی ءِ زوراکی ءُ ترندیں روش ءِ ھلاپ ءَ نی گیشتر ھاموش نہ بئیگ ءِ اھد کنگ بیتگ۔