ھزدار ءِ جھمنندیں سائرہ بلوچ ءَ شال ءَ وائس فار بلوچ مسنگ پرسنز ءِ بنجل ءَ چہ یک تامر بندے شنگ کنان ءَ گوشتگ کہ آئی ءِ برات ءُ ناکوزتک ءِ بیگواھی ءَ چار سال سرجم بیگ ءَ ابید ھم دیم ءَ آرگ نہ بیتگ اَنت-
سائرہ بلوچ ءَ گوشتگ کہ من وتی برات آصف ءُ رشید ءِ بیگواھی ءِ ھلاپ ءَ ھرجاہ ءَ زھرشانی کتگ اشی ءُ ابید ھم دراھیں آئینی ءُ کانونی راھبندانی رند پد داشتگ اَنت آمیدگس کمیشناں دراھیں جاھاں وتی گپ برتگ منی برات ءُ ناکوزتک آیانی ھمراھانی ھواری ءَ بیگواہ کنگ بیتگ اَنت-
زانگ بہ بیت آصف ءُ رشید آیانی دگہ نُھ کسانی ھمراھانی ھمراھی ءَ نوشکی زنگی ناڑو ءَ پاکستانی پھزداری لشکر ءَ دزگیر کرتگ ءُ برتگ اَنت- پد ءَ آ آیانی اکس دیم ءَ اتکگ اَنت پوج ءَ یک لشکر کشی ءِ میان ءَ دزگیر کنگ ءِ ٹاہ داتگ-
آصف ءُ رشید بنکی ءَ ھزدار ءِ نندوک اَنت آ سِی ءُ یک اگست دوھزار ءُ ھژدہ ءَ آیانی سنگتانی ھمراھی ءَ بیگقاہ کنگ بیتگ اَنت پد ءَ وھد وھد ءِ سر ءَ آیانی ھمراہ یلو کنگ بیتگ اَنت کہ اشانی تہ ءَ بلوچ گھگیریں ازمکار میر احمد ءِ زھگ بلال بلوچ ھم ھوار بیتگ-
سائرہ بلوچ ءَ دیمتر ءَ گشتگ کہ آمیدگس چم دیستگیں گواہ لوٹ اَنت بلے پھزداری لشکر آ دگہ مردماں بیھار دیگ ءَ اَنت آگاں آیاں آصف ءُ رشید ءِ بارو ءَ آمیدگس ءَ گپ جت گڑا آ پد ءَ بیگواہ کنگ بنت-
سائرہ بلوچ ءَ بلوچ سیاسی گل ءُ انسانی ھکانی ادارھاں گوں لوٹ کتگ آیانی برات ءِ یل کنگ ءَ منی توار جوڑ بہ بنت-