بلوچانی گوم ءَ گلامی ءِ سلوک کنگ بوگ ءَ اِنت کہ آ مارا کبول نہ اِنت- ھدایت الرحمان بلوچ

ھک دے تھریک ءِ نیمگ ءَ تربت پریس کلب ءِ دیم ءَ ڈی سی گس ءَ رؤکیں دگ ءَ شمبے ءِ روچ ءَ یک زھرشانی نندانکی ءِ برجم دارگ بوتگ، نندانک ءَ نشتگیں مردماں گوں تران کنان ءَ ھک دے تھریک ءِ سروک مولانا ھدایت الرحمان بلوچ ءَ گْوشتگ کہ بلوچستان ءَ بیگواھیں مردمانی جیڑہ یک بلاھیں جیڑھے، ماتاں ڈیھ ءَ چہ وتی چُک دوست اَنت ، کہ آ ازیت جاھاں بند کنگ بوتگ مروچی ھم اے نندانک ءَ ھیرونک ءُ دگہ دمگاں چہ بیگواھیں مردمانی کھول ساڑی اَنت، اے ماتاں انساپ بدے اَنت ءُ بیگواھیں بلوچاں یل بہ کن اَنت-

آئی ءَ گْوشتگ کہ اسلام آباد ءَ چہ بیگواھیں حفیظ بلوچ بلوچستان یونیورسٹی ءِ بیگواھیں نودربر فصیح بلوچ ، سھیل بلوچ ءُ ساری براھیم کجام جرم ءَ چست کتگ اَنت، اے نودربر اَنت اشاں یل بہ کن اِت-

آئی ءَ گْوشتگ کہ مروچی ھک دے تھریک لَس مھلوک ءَ زبان داتگ پیسر ءَ مردمانی زُبان ءَ کُبل لگتگ صوبیدار ءِ دیم ءَ گپ کنگ تُرس اِتگ اِت، بلے ھک دے تھریک ءِ بدولت لَس مھلوک ھم آرمی چیف ءِ دیم ءَ ھک گپ کنگ ءَ نہ تُرس اَنت اے ھک دے تھریک ءِ سوبمندی اِنت-

آئی ءَ گْوشتگ کہ ڈیھ ءِ کجام ھما سیمسر ءَ گر ءُ دار نیست بلے بلوچستان ءَ بلوچانی واست ءَ سیمسر بند اَنت ، یک کیلوے آرت زورگ ءِ ھم اجازت دیگ نہ بیت اے زُلمے نہ اِنت گُڑا چی یے، مروچی بلوچانی گوم ءَ گلامی ءِ سلوک کنگ بوگ ءَ اِنت کہ آ مارا کبول نہ اِنت ، آئی ءَ گْوشتگ کہ ٹرالرنگ چہ بلوچستان زر تباہ ءَ اِنت ٹرالرنگ ءِ ھچ وڑیں موکل ندے ایں –

آئی ءَ گْوشتگ کہ ھک دے تھریک ڈیتھ اسکواڈ، منشات بند کنگ ءِ لوٹ ءَ کنت-

آئی ءَ گْوشتگ کہ گلزار دوست پیادگ روانک ءِ پلامرزی کتگ ءُ گْوشتگ ھک دے تھریک ءِ باسک پنجگور ءَ چہ باندا اے زھرشانی ءَ تاں شال ءَ ھوار بیت ءُ شال ءَ گوں جوانیں وڑے ءَ وش آتک کنگ بیت ، نندانک ءَ دیریں دمگاں مزنیں کچے ءَ راج ھوار بیتگ اَنت، نندانک ءَ چہ جماعت اسلامی کیچ ءِ امیر غلام یاسین، نیشنل پارٹی ءِ دمگی صدر مشکور انور ، پروفیسر گلاب بلوچ، صادق فتح ءُ دگراں تران کتگ-