بلوچستان ءِ دمگ چاگی ءَ سھر ءُ آسن دراھگے جاہ سیندک ءَ کارکنوکیں چینی کمپنی ءِ نیمگ ءَ کرونا ایس او پیز ءِ نام ءَ دمگی مردمانی ترءُ تابءِ سر ءَ بندش جنگ ءُ سیندک ءَ دکان ءُ اسکولانی بند کنگ ءُ کارکنوکاں زندانیانی پیم ءَ بندیگ کنگے بگیری ءَ دمگی زالبولاں زھرشانی کتگ ءُدگانی سر ءَ در اتکگ انت، آھاں سیندک ءَ تفتان ءُ نوکنڈی ءَ رؤکیں دگ ءِ سر ءَ پولیس چیک پوسٹ ءِ نزیک ءَ ننداک جتگ ءُ دگ بند کُتگ-
اے زھرشانی ءَ زالبولاں ھوار زھگ ھم ھوار بوتگ انت کہ آھاں کرونا ءِ نام ءَ دمگی مردم ءُ کارکنوکانی زندگی ءِ ازاب جوڑ کنوکیں چینی کمپنیایم آر ڈی ایل ءُ پاکستانی اپسرانی بگیری ءَ اوگام جتگ-
زھرشانی کنوکاں بازیں ادار ءَ شاھدگے سر ءَ نندانک جتگ ءُ دگ بند کُتگ بلے پدا رند ءَ ٹکی رھشون سردار عطاالرحمن موسی زئی ءِ باورکنائینگ ءَ آھاں سَے روچ ءِ ھاتر ءَ وتی زھرشانی ھلاس کُتگ کہ آئی ءَ کول کتگ کہ چینی کمپنی ءِ واکدارانی دیم ءَ آھانی لوٹاں ایر کنت ءُگامگیج زوریت-
زھرشانی کنوکیں زالبولانی گوشگ ات کہ آھانی کارکنوکیں مردیناں شش ءَ بگر نُھ داں ماہ ءَ گِساں آھگ ءَ نیل اَنت وھدیکہ دمگی مردماں الاج ءِھاتر ءَ سیندک نادراھجاہ ءَ رؤگے اجازت ھم نیست-
آھاں لوٹ کُتگ کہ چینی کمپنی اے ترندی ءُ زوراکیانی بگیری ءَ گامگیج زورگ بہ بیت-