بلوچ یکجھتی کمیٹی، وائس فار بلوچ مسنگ پرسنز، نیشنل ڈیموکریٹک پاٹی ءِ جارکشاں رسانکدراں وتی شنگ کرتکیں یکجاھیں درشان ءِ تہءَ بلوچستان ءَ ابید آمیدگسی زورانسری آوار جنی ءُ کُشت کوشانی بگیری ءَ شال پریس کلب ءِ دیم ءَ زھرشانی کنگے جار جتگ ءُ گوشتگ کہ بلوچستان ءَ ریاستی زوراکیانی نوکتریں درچ بیمناک اِنت- زورانسری آوار جنی ءُ ابید آمید گس پرمان ءِ بازیں کُشت کوش اے گپ ءِ گواہ اَنت کہ بلوچستان ءِ تہ ءَ ریاستی ادارگ تاکت ءِ کارمرز کنگے سر ءَ اوست داریت ءُ دگہ ھچ وڑیں کانود ءُ رھبندانی پابند نہ انت- وھدیکہ مزن وزیر ءُ سرکار ءِ واکدارانی بٹاکاں ابید بلوچستان ءَ زورانسری آوار جنگ بوتگیں مردمانی یل کنگ ءِ جاہ ءَ چدوگیشتر مردم زورانسری آوار جنگ ءُ بیگواہ کنگ بوھگ ءَ انت ءُ اشی ءِ تہ ءَ ھمک روچ گیشی آھان انت- سرکاری اسکولانی ماسٹراں بگر داں وانندھیں نودربراں ھچ کس بلوچستان ءِ تہ ءَ پھریزتگ نہ اِنت- شھر ءُ بازاراں بگر تاں کوچگاں بلوچستان ءِ کُند کُنڈاں پوجی لشکر کشی برجاہ انت ءُ گیر کانودی بے رھبندی ءَ گوں برجاہ انت- بلوچ راج ءَ لوٹیت کہ اشی ءِ بگیری ءَ جوانیں وڑیے ءَ توار چِست بہ کن انت-
جارکش ءَ گوشتگ کہ بلوچستان ءَ تھنا ھمے ماہ ءَ پنجگور، تربت، نوشکی، ھزدار، سبی، لیاری ءُ بولان ءَ ھوار بازیں دمگاں مزنیں کچے ءَ مردم زورانسری آوار جنگ ءُ بیگواہ کنگ بوتگ انت وھدیکہ بازیں دمگاں تنی وھدی لشکر کشی برجاہ انت کہ چریشی ءَ لس مھلوکے نہ تھنا چاگردی زند سانمند اِنت بلکینہ مالی درگت ءَ ھم مھلوک دو وھد ءِ نگن ءَ چمدار جوڑ بوتگ اَنت- اے وھدی بلوچ راج ءَ یکجاھی سزا دیگ بوھگ ءَ اِنت اشی ءِ دارگے یکیں راہ راجداری گھگیری اِنت- بلوچ راج ءَ پہ اے زوراکیانی بگیری ءَ توار چست کنگ ءُ جُھد کنگ المی اِنت-
جارکش ءَ وتی درشان ءِ گڈسر ءَ گوشتگ کہ بلوچستان ءَ ھمے زوتاں بوتگیں ریاستی زلم زوراکیانی بگیری ءَ بیست ءُ دو فروری ءَ سَے شمبے ءِ روچ ءَ ادار دو ءَ شال پریس کلب ءِ دیم ءَ زھرشانی کنگ بیت اِنت- آھاں چہ بلوچ راج ءَ ھوار درسیں ایردستیں راج ءِ مھلوکاں چہ لوٹ کتگ ءُ گوشتگ کہ اے زھرشانی ءَ شریں وڑیے ءَ بھر بہ زور اَنت-