پرایمنیں زھرشانیانی سر ءَ ارزی نبشتہ کنگ انسانی ھکانی بگیری دارگ انت – نصراللہ بلوچ

شال ءِ پولیس ءِ نیمگ ءَ چہ بیگواھیں مردمانی ھاتر ءَ زھرشانی کنوکانی نام ءَ ارزی نبشتہ کنگ ءُ آھاں باگی گوشگے ءِ بگیری ءَ وائس فار بلوچ مسنگ پرسنز ءِ رھشونان ھوار وکیلاں شال پریس کلب ءَ پریس کانفرنس کُتگ؛

ہیومن رائٹس کمیشن آف پاکستان ءِ گوستگیں سرکماش ءُ وکیل طاہر حسین ایڈوکیٹ، سرکماش نصراللہ بلوچ ءَ دگہ ھمراھانی ھواری ءَ حاجی لشکری رئیسانی، نصراللہ بلوچ ءُ ماما قدیر بلوچ ءَ ھوار بیگواھیں مردمانی کھول ءِ نام ءَ ارزی نبشتہ کنگ ءُ آھاں باگی گوشگے بگیری ءَ شال پریس کلب ءَ اھوالکاراں گوں تران کُتگ –

اھوالکاراں گوں تران نصراللہ بلوچ ءَ گوشتگ کہ وائس فار بلوچ مسنگ پرسنز یک گیر سیاسی پاٹی یے ءُ گوستگیں سینزدہ سالاں بیگواھیں مردمانی ھاتر ءَ پُرایمنیں جھد کنگ ءَ اِنت ءُ روچ مروچی ما ھچ ادارھانی بگیری ءَ گپ نہ جتگ بلے ھچ سمجا آھگ ءَ نہ انت کہ ملک ءِ ادارہ کانود ءِ پاسداری ءَ پرچا نہ کن انت –

آئی ءِ گوشگ ات کہ گوستگیں سال ءَ بیگواھیں مردمانی ھاتر ءَ ٹی این ٹء چار راہ ءَ مئے زھرشانی ایمنی ءَ گوں بوتگ – پولیس ءِ ارزی سمج ءَ چہ ڈن ءُ انسانی ھکانی بگیری انت –

نصراللہ بلوچ ءِ گوشگ ات کہ اگاں وزیراعلی کانودی وڈ ءُ ڈول ءَ ارزی ءَ ھلاس نہ کنت گڈا سرجمیں ملک ءَ زھرشانی کنیں ءُ ادرھانی اے رویش ءِ بگیری ءَ درسیں میاں استمانی انسانی ھکانی ادارھاں نمدی نبشتہ کنیں –

اے وھد ءَ وکیل طاہر حسین ایڈوکیٹ ھم ساڈی بوتگ کہ آئی ءَ اھوالکاراں گوں تران کنان ءَ گوشتگ کہ بیگواھیں مردمانی ھاتر ءَ ایمنیں روانک ءِ کشگ بوتگ ھنون سرپد بوتگاں کہ روانک ءَ ھواریں مردمانی نام ءَ پولیس ءِ نیمگ ءَ چہ ارزی نبشتہ کنگ بوتگ –

طاہر حسین ایڈوکیٹ ءِ گوشگ ات کہ اے وڑیں ارزی بس سیاسی وڑ ءُ ڈولاں نبشتہ کنگ بنت، بیگواھیں مردمانی ھک ءَ روانک کشگے سر ءَ ارزی نبشتہ کنگ پندلے –

آئی ءَ گوشتگ کہ ماما قدیر، نصراللہ بلوچ ءُ دگہ مردمانی نام ءَ پولیس نیمگ ءَ نبشتگ کنگ بوتگیں ارزی ءِ کانودی وڑ ءُ ڈول ءَ مکابلہ کنیں –