صحبت پور : گیرت نام ءِ سر ءَ یک مردمے کُشگ بوتگ، زالبول ءِ زدگ

سربوتگیں ھالانی رد ءَ بلوچستان ءِ دمگ صحبت پور ءَ تیر گواری ءَ چہ یک مردمے کُشگ بوتگ وھدیکہ زالبول ءِ زدگ بوتگ –

تیرگواری ءِ وئیل صحبت پور ءَ بوتگ پولیس ءِ رِد ء صحبت پور ءَ گیرت نام ءَ یک مردمے ءَ تیرگواری کُتگ ءُ یک مردمے کُشتگ ءُ وتی لوگی زدگ کُتگ –

پولیس ءِ رِد ءَ تیر زالبول ءِ پاد ءَ لگتگ پہ الاج ءِ ھاتر ءَ نزیکیں نادراھجاہ ءَ سر کنگ بوتگ –

زانگ بہ بیت سند ءُ بلوچستان ءِ جتا جتائیں ھند ءُ دمگاں گیرت ءِ نام ءَ کوش ءِ وئیل مدامی رپورٹ بوھگ ءَ انت –

گوستگیں روچانی تہ ءَ جیکب آباد ءِ جھمنند شوکت مرہٹو ءَ ھراب کاری ءِ الزام ءَ وتی لوگبانک تیرباران کُتگ ءُ تتکگ –

ھمے سال ءِ بندات ءَ نصیر آباد تمبو ءَ یک مردم ءَ گیرت ءِ نام ءَ وتی وارس ءُ گھار ءَ ھوار یک مردمے کُشتگ وھدیکہ ھمے ماہ ءَ ھب ءَ سند ءِ جاھمنند ءَ تیرگواری کُتگ ءُ وتی پیشی زال کُشتگ –

کچ ءُ کساس ءِ رد ءَ پاکستان ءَ گیرت ءِ نام ءَ ھر سال ھزار ءَ چہ گیش زالبول کُشگ بیت اتنت ءُ گیشتر بلوچستان سند ءُ پنجاپ ءَ اے وئیل بنت –